Şêniyên navçeya Dirbesiyê ji ber xirabûna rêyan zehmetiyan dikişînin. Şaredariya Gel a navçeyê soz da ku rêyan sererast û qîr bike. Lê derfetên şaredariyê têrê nake.
Derdora 187 gund girêdayî navçeya Dirbesiyê ne. Piraniya rêyên van gundan bi çal û kort in. Ji ber vê jî welatiyên van gundan xwestin ku çareserî were dîtin.
Welatiyê bi navê Umer Comerd ji gundê Umerzobaş bang li şaredariyê kir ku ji nû ve rêyan qîr bike û wiha got: “Rê gelekî xirab bûne, me daxwaznameyek ji şaredariyê re pêşkêş kir, şaredarî soz da lê heta niha em li benda pêkanîna wê sozê wê ne.”
Welatiyê bi navê Hemed El-Hewas ê ji gundê Bab El-Selam diyar kir ku ji ber nebaşiya rê ew naçin navçeyê.
Hevserokê Şaredariya Gel a Dirbesiyê Salih Ibrahîm girêdayî mijarê wiha got: “Em dixwazin hemû rêyên navçeyê sererast û qîr bikin, lê ji ber kêmderfetan tişt ji destê me nayê.”
Her wiha Ibrahîm tekez kir ku dema derfet peyde bûn, wê rêyan sererast bikin…ANHA
