Hevserokê Komîteya Çand û Hunerê ya Rêveberiya Sivîl a Demokratîk a Tebqayê Elî Elaya ragihand ku di 1’ê Îlonê de pêşangeha El-Ensab (xizm) a şaristaniyên Mezopotamyayê di bin dirûşmeya “Biratiya gelan rastiyek e û ne dirûşmeyek e” de wê were vekirin.
Hevserokê Komîteya Çand û Hunerê ya Rêveberiya Sivîl a Demokratîk a Tebqayê Elî Elaya ragihand ku hevkarî bi komeleya El-Ensab a Zanistî ya qebîleyên Ereban û Partiya Sûriya Paşerojê re pêk hatiye da ku peywendiyê bi dewletên erebî û kesayetên dîrokî û çandî re bikin da ku bêne vexwendin û beşdarî çalakiyên pêşangeha El-Ensab a şaristaniyên Mezopotamyayê bêne kirin.
Armanca pêşangeha El-Ensab El-Erebiyê ew e ku şaristaniyên li ser axa Mezopotamyayê jiyane, bêne nasandin. Her wiha ji aşiqên çand û kevneşopiyê re xebatên dîrokî yên gelên herêmê zelal dike, bi taybetî bi riya nexşe, fikr û semîneran rêbaz û şêwazên ku hiştine ev şaristanî bibin xwedî girîngiyeke dîrokî ya mezin bêne gotûbêjkirin.
Di pêşangehê de wê nexşe û wêneyên hin kesayetên qebîle û eşîrên Ereb, Kurd, Suryan, Çerkez û Asûr bêne pêşandan.
Elaya diyar kir ku di pêşangehê de wêneyên hin kesayetên dîrokî ku xwedî bandor û roleke mezin di pêkanîna fikr û têkoşîna civakê de di hemû aliyan de bêne pêşandan, bi taybetî hin taybetmendî heta niha tên jiyîn ku çand û huner gelan nêzî hev dike û rola wan di aramiya fikrî û hişmendiya gelan de mezin bû.
Hêjayî gotinê ye piraniya şaristaniyên Mezopotamyayê ji ber şerên li herêmê rû dane hatine pişaftin. Herî dawî dagirkeriya çeteyên DAIŞ’ê ku gelek peyker û nexşeyên şaristaniyên mirovahiyê li herêmê dizîn û di bazarên Tirkiyê de hatin firotin…ANHA
Pêşangeha Şaristaniyên Mezopotamyayê vedibe
