Divê ciwan pêşengiya rizgarkirina Efrînê bikin

Yek ji rêvberên YCR’ê Harûn Apoyî diyar kir ku ew ciwanan li ser pîvana “Şerê gel ê şoreşger” perwerde dikin.
Li navçeya Ehres a girêdayî herêma Şehbayê Yekitiya Ciwanên Rojava (YCR) civînek ji ciwanên Ereb re li dar xist. Bi dehan ciwan tev li civînê bûn.
Ji rêveberên YCR`ê Harûn Apoyî di civînê de li ser armanca dewleta Tirk a dagirker li Efrînê û rola ciwanan di rizgarkirina Efrînê de, axivî. Apoyî destnîşan kir ku pêwîst e ciwan serkêşiyê ji pêngava rizgarkirina Efrînê re bikin.
Apoyî destnîşan kir ku armanca dewleta Tirk a dagirker û çeteyên li Efrînê ne tenê gelê Kurd bû, dixwestin projeya biratiya gelan li wê derê têk bibin. Niha jî demografiya herêma Efrînê diguherînin.
Harûn Apoyî diyar kir ku ew di pêvajoyeke hesas re derbas dibin û got: “Em di seferberiyeke giştî re derbas dibin. Me dest bi perwerdekirina ciwanan li ser pîvana “Şerê gel ê şoreşgerî” kir. Ciwanên Ereb û Kurd amade ne ku tev li hemleya rizgarkirina Efrînê bibin û her bihostekê ji welatê xwe rizgar bikin.”