Birûc Resûl/Qamişlo
Amadekariyên pêkanîna ezmûnên xwendekarên refa 9 û 12’an yên minhacê hikumeta Şamê û minhacê Rêveberiya Xweser, li Bakur û Rojhilatê Sûriyê bi rêya komîteyên hevbeş bi rê ve diçe.
8`ê Hezîranê Desteya Perwerde û Fêrkirinê ya Rêveberiya Xweser bi biryarnameyekê eşkere kir ku wan û desthilata Şamê der barê pêkanîna ezmûnên refa 9 û 12`an (qonaxa navîn) li hev kiriye. Hejmara giştî ya xwendekarên refa 9 û 12`an (giştî û serbest) ên ku minhacên hikumeta Şamê dixwînin, derdora 70 hezar xwendekar in.
Derbarê hazirtiyên ezmûnên Navîn û amedehî Cîgirê Desteya Perwerde û Fêrkirinê ya Bakur û Rojhilatê Sûriyê Azad Berazî ji Rojnemeya me re axivî.
Azad Berazî di destpêka axaftina xwe de bal kişand ser rewşa ezmûnên refên 9 û 12`an û wiha got: “Di 5-6`ê
Hizêranê civînek di navbera Desteya Perwerdê a Bakur û Rojhilatê Sûriyê û wezareta perwerdê ya Şamê di derbarê ezmûnan hat cêkirin. Bê guman girêdayî dibistan û xwendekaran gelek xalan hatin nîqaşkirin, yek ji wan xalên bigihîn ew bû ku çêkirina ezmûnan li herêma Bakur û Rojhilatê Sûriyê çi amedahî û Navîn be. Lê di demê niha de em li ser Navîn bêtir kar dikin.”
Sîstema perwedê ya Rêveberiya Xweswer nehatiye guhertin
Azad diyar kir ku minhacên Rêveberiya Xweser ti guhertin têde nehatine çêkirin û ezmûn jî wekî xwe dimînin û wiha dewam kir: “Li gorî biryarnameyê ezmûnên ku dihat payin 14`ê Hezîranê wê ezmûnên refê 9`an wê werin despêkirin, di heman demê de di 15`ê Hizêranê de wê ezmûnên amedahî dest pê bikin. Lê ji bo refê 9`an roj hat guhertin ku di 21`ê Hizêranê de ezmûn werin destpêkirin. Belê me dest bi tomarkirina şagirtan kiriya û li gelek navendên Bakur û Rojhilatê Sûriyê ku ezmûn bi awayekê serkeftî têde derbas bibin, mîna li bajarê Qamişli, Hesekê, Reqa, Tebqa û Derezorê.”
Azad Berazî Cîgirê Desteya Perwerde û Fêrkirinê ya Bakur û Rojhilatê Sûriyê di dawiyê de da zanîn ku pirsên ezmûnan wê ji hêla Wezareta Perwerdeyê ya Sûriyeyê ve bên amadekirin. Makanîzmeya pêkanîna ezmûnan û çavdêriya li ser wê wê bi rêya komîteyên hevbeş ên demkî ku ji Desteya Perwerde û Fêrkirinê ya Rêveberiya Xweser û Wezareta Perwerdeyê ya Sûriyeyê pêk tê, were birêvebirin.”
