Birûc Resûl/Qamişlo
Li gundê Girşêran ê girêdayê navçeya Tirbespiyê ahanga Cejna Ekîto, bi beşdariya nûnerên Rêveberiya Xweser bi coşeke pir mezin, bi rihê Netewa Demokiratîk bi şahiyekî hate pîroz kirin.
Welatiyên Kildan û Asûrî di 1’ê Nîsanê de Cejna Ekîto pîroz dikin, li gorî jêderên aşûriyan ev cejin ji 6 hezar û 774 salan ve û heta niha tê pîroz kirin. Aşûrî dibêjin ku cejna Akîto sersala Aşûriyan ne û bi zimanê Aşûrî ‘Xanîsan’ lê tê kirin. Li gorî baweriya wan di vê rojê de dema xêrêye û destpêka Buharê ye. Li gorî evsaneya aşûriyan di vê rojê de xwedawenda evînê Eştar bi ‘xwedawendê xwezayê Temûz re zewiciye’ Di evsaneyê de behsa nakokiyên di navbera Eştar û Temûz de tê kirin. Gelên Aşûrî û Siryanî di 1’ê meha Nîsanê de cejna sersala nû Ekîto pîroz dikin. Li gorî kevneşopiyên Aşûriyan di cejna Ekîto de li çolan û di nava xwezayê de ahengên curbecur têne lidarxistin. Mîna 21`ê Adarê dejina Newrozê tê pîroz kirin.
Li gundê Girşêran ê girêdayî navçeya Tirbespiyê Cejina Ekîto hat pîroz kirin, qada pîrozbahiyê bi alên Partiya Yekitiya Suryanî, Partiya Aşûrî ya Demokratîk û Rêxistina Aşûrî ya Demokratîk hatin xemilandin. Bedewiya jinan bi cil û bergên xwe yên gelêrî bi Biharê re bûbû yek û tabloyeke pir xweşik derxistibû holê. Her wiha nûnerên Rêveberiya Xweser, Desteya Jin a Kantona Cizîrê, nûnerên Hêzên Ewlekariya Hundirîn-Jin amade bûn. Di destpêka şahiyê xoleyek rêzgirtin li ser giyanên şehîdên şoreşê hat rawistandin.
Piştre beşek filoklorî ji aliyê koma dîlanê ya Rêxistina Elesoriyê ve, dîlaneke filoklorî ji aliyê koma çandî ya suriyaniyan û koma hunerî ya Barmaya hatin bêşandan. Di heman demê de koma dîlana şêxanî û bagiyê hat pêşkêşkirin.
Piştira koma dîlanê ya bi navê Ezî Tema, Koma dîlanê ya Şoşola û dîlana Norê Norê hat pêşandan.
Derbarê 1`ê Nîsanê Cejina Ekîto û pîrozbahiya wê de Rinyo Koriye ji koma Ornîna ya Dîlanê û hevseroka ciwanên Suriyanî Marima Hena ji Rojnemeya me re axivîn.
‘Em bi hêvî ne ku Ekîto bibe misogeriya naskirina Rêveberiya Xweser’
Rinyo Koriye diyar kir ku berê wan nedikarî pîrozbahiyên bi vî rengî li dar bixin. Bi saya Rêveberiya Xweser ew ê hemû salan cejina xwe li gelan pîroz bikin. Sîstema demokratîk a ku pêk hatiye, li gel hev digre û wê ev yek bidome û wiha got: “Li Bakur û Rojhilatê Sûriyeyê her netew bi rengekî azad û demokratîk cejinên xwe yên niştîmanî û neteweyî bê tirs, pîroz dikin. Her wiha îro hemû Xirîstiyan bi cil û bergên xwe yên neteweyî yên filoklorî berê xwe dane şahî û pîrozbahiyê. Cejina Ekîto ji Mezopotamyayê dest pê kir û îro li tevahî Sûriyeyê cejinê pîroz dikin, ji ber ku rojeke pîroz e û nûbûna jiyanê digre nava xwe. Em bi hêvî ne ku ev cejin bibe misogeriya naskirina Rêveberiya Xweser a Bakur û Rojhilatê Sûriyeyê.”
‘Ji Newrozê ber bi Ekîto û Çarşema Sor ve’
Marîna Hena têkildarî Cejina Ekîto û Çarşema Sor wiha got: “Devera Mezopotamya ku di navbera herdû çeman Dîcle û Firatê de ye, xwedî dîrok û şaristaniyeke kevnar e. Mezopotamya dibe dayika hemû şaristanî, çand, zanist, ol û netewan. Her wiha dergûşa hemû mezheban e, ji Sumeran heta Akadan, Babîl, Aşur, Med, Mîtanî û Horiyan e ku hemûyan jî bi hev re lê jiyan û yekitiyeke pêşeng ava kirine. Ji Newrozê ber bi Ekîto ve, ji Ekîto ber bi Çarşema Sor ve, her wiha hemû cejinên me jî diyar dikin ku ev hemû gel li ser vê axê bi xweşî û nexweşiya xwe, jiyanê domandine û parastina çandên xwe kirine. Dewlemandiya her çandeke li ser vê axê bû sedem ku gelek dewletên hegemon çav berdine wan û bixwazin bi riya şerê olî, mezhebî û gelek rê û rêbazên din wan çand û civakan têk bibin. Gelê aşur, kurd, Ermen û Suryan jî bi gelek êrişên qirkirinê re rû bi rû man, ji lewre em neçar in di roja îro de çarenûsa xwe bikin yek û dawî li êrişên wiha bînin. Em bi hêvî ne ku Cejina Ekîto bibe destpêkirinek ji bo bidawîkirina şer û tundiya ku herêm pê re rû bi rû dimîne û bibe misogeriya demokrasî û edaletê.”
