Ayren Hesen/Qamişlo
Gelê Qamişlo li pêşiya Çarxereya Şehîd Yûsif Gula pêşwaziya Rêveberiya herêma Qamişlo Jiyan Dêrik (Cîhan Hesam) kir û erka wê ya nû lê pîroz kirin.
Di seat 6 êvarê de gelê Qamişlo li cem Çerxereya Şehîd Yûsif Gulo kom bûn, da ku pêşwaziya Rêveberiya herêma Qamişlo ya bi ser Parêzgeha Hesekê Jiyan Dêrik (Cîhan Hesam) ve, bikin.
Gelê Qamişlo Rêveberiya herêma Qamişlo Cîhan Dêrik bi tililiyan û drûşmeya Jin Jiyan Azadî pêşwazî kirin. Piştî pêşwaziyê Rêveberiya herêma Qamişlo Cîhan Hesam axivî û wiha got: “Care yekemîne jineke Kurd di dîroka Sûriyê de cihê xwe di asta rêveberiya herêmê de digire. Ji bo xizmeta vê civakê eger çi ji me were xwastin em ê bikin, hemû derfet û îmkanên xwe em ê bikin xizmet û pêşkêşî vî gelî bikin, ez ê dengê vî gelî bighînim her derê. Çawa ku jina Kurd di her warî de pêşangtî kir, emê niha jî pêşengtiyê ji Sûriyek demokrat re bikin. Qamişlo kaniya hezkirin û hêviyê ye, em ê vê hêviyê li tevahî Sûriyê belav bikin. Wê deriya Rêveberiya herêma Qamişlo ji her kesî re vekirî be.”
Cîhan Hesam (Jiyan Dêrik) Şêwermenda Rêveberiya Xweser a Kantona Cizîrê bû. Herwiha ji bo birêveçûna pêvajoya entegrasyonê ya di navbera Hêzên Sûriya Demokratîk (QSD) û hikumeta demkî a Sûriyê cihê xwe li kêlekî Parêzgarê Hesekê Nûredîn Ehmed digirt. Niha jî piştî salên dirêj ji xebat û têkoşînê Jiyan Dêrik bi biryara Wezareta Rêveberiya Herêmî û Jîngehê ya Sûriyê û bi îmzeya Parêzgarê Hesekê Nûredîn Ehmed, ew wekî Rêvebera Herêma Qamişloyê hate erkdarkirin.
