Hêvî Melek/ Qamişlo
Bi boneya 27`ê Adarê roja şanoya cîhanî û di heman demê de salvegera şehadeta şehîd Yekta Herekol çalakiyên hunerî hatin destpêkirin. Di 27`ê Adara 2024`an li navenda Mihemed Şêxo 2 şanoyên bi navê ‘Dika heqîqetê, hatin pêşkêşkirin.
27`ê Adarê roja şanoya cîhanî ye û di heman dîrokê de salvegera şehîd Yekta Herekol e ku ji bo doza gel û azadiyê li meydana Saed Ellah El cabirî agir bi bedena xwe xist. Ji ber vê yekê her sal di vê rojê de her kes dest bi mehrecanan dikin lê îsal hin girûpên şanoyê şanoyên xwe pêşkêş kirin.
Şanoya Wê were
Yek ji şanoyên balkêş ya ku ji bo salvegera şehadeta Şehîd Yekta Herekol şanoya bi navê wê were li Navenda çand û hunerê ya Mihemed Şêxo hat pêşkêşkirin ku ji aliyê koma Tiyatro hatiye amadekirin û ji aliyê endamên kom Tiyatroyê Şevzan Mehmûd hatiye nivîsandin û di heman demê de lîstikvanî jî têde kiriye. Ji ber ku şano vegotin û nameya milet ya ku rû bi rû maye û neynika civakê ye şanoya bi navê (wê were) ji bo balkişandina li ser êş û azarên civakê û êşa koçberiyê ku civak têde derbas dibe hat çêkirin, armac jê ew bû ku bandoriyek û girêdanek bêtir bi xak û welat çêbibe, berî 3`ê mehan hazirtî ji bo vê şanoyê hatine kirin, şanoya ku 2 kesan têde lîstikvanî kirine yek ji wan lîstikvanan jî yê ku derhênertiya wê kiriye Şevzan Mehmûd e, ku cara yekeme ji bo salvegera şehîd Yekta Herekol hatiye pêşkêşkirin.
Dika Heqîqetê
Şanoya duyem jî ya bi navê şanoya (Dika Heqîqetê) ji aliyê derhêner Osman Qortelan hatiye nivîsandin, cara yekem ji bo salvegera 20`emîn a şehadeta şehîd Yekta Herekol û di heman demê de ji bo roja şanoya cîhanî li navenda çand û hunerê ya Mihemed Şêxo hat pêşkêşkirin. Şanoya Dika Heqîqetê li ser jiyana şehîd Yekta Herekol bû ku tê de 22 kes beşdar bûne. Di mehekê de şano hat hazirkirin, hem jî kesên beşdar hatin perwede kirin.Di şanoyê de bal hat kişandin li ser êş û azarên ku şehîd Yekta Herekol jiyan kiriye.
