Hunermend Nînos Sabit ku bi xwe buye şahidê bûyera şewatê ya Li Hemdaniyê, li ser karasata ku rû da û bi dehan kesan têde jiyana xwe ji dest dan, tabloyek xêz kiriye. Nînos diyarkir ku wî xwestiye bi rêya tabloyekê karesata ku rû daye, xêz bike.
Di şeva 26’ê Îlona 2023’yan de li bajarokê Hemdaniye ya ser bi parêzgeha Musilê li salonek dawetê de şewat derket. Di encama şewatê de 122 kesan jiyana xwe ji dest dan û zêdetirî 200 kes jî birîndar bûn. Kesên jiyana xwe ji dest dayîn ji baweriya Xiristiyan bûn.
Hunermendê Peykertraş û Şêwekar yê deşta Ninowayê Nînos Sabit ku bi xwe di dema bûyerê de şahidî jêre kir, bi xêzkirina tabloyekê karesata Hemdaniye raxistiye ber çavan. Ninos Sabit di derbarê dema bûyerê û armanca xêzkirina tabloyê de ji ajansa me re axivî.
Nînos Sabit diyarkir ku wê şeva ku bûyer rû dayî, ew bi xwe li wêderê amadebû û got: “Ez li nava wê karesatê de bûm û wek şahidê wê karesatê me. Min gelek kesên ku şewitîbûn dîtin, ez şoq bûm. Destpêkê min wisan zanî ku salon şewitiye û kêmek ziyan gihayê, lê dema hinek nêzîk bûm min dît karesatek mezin rû daye. Min dît ku xelk digiryan, hinek şewitîbûn, hinek ji ber dûkelê xeniqîn. Dîmenek pir bi êş hebû ku di tû filman de jî dîmenek wisan nine.”
Ninos Sabit got: “Piştî bûyerê min biryar da ku tabloyek li ser wê karesatê çêkim. Di du rojên destpêkê yên bûyerê de xelk di nava şoqê de bû. Ez jî bi heman rengî bûm, heta sê rojan min nedikarî ti karekî bikim. Her roj agahiya mirina heval û xizmek me dibihîst. Min di dilê xwe de got, divê ez tiştek li ser vê karesatê çêkim.”
Di dewamê de Ninos Sabit diyarkir ku wî dest bi çêkirina tabloyek bi qebareya 180 santîm dirêjî û 150 santîm firehî kir. Ninos eşkere kir ku wî di tabloyê de rengê zeytê bikaraniye û got, ev tablo behsa karesatê dike, lê wateyek xwe ya taybet heye.
Têkildarî tabloya xêzkirî Ninos got: “Her çiqas dîmenek bi êş hebû, lê ji ber tirsa dîmenan min nekarî êşa mezin a vê bûyerê di karê xwe yê hunerî de nîşan bidim. Ji bona wê min zarokek nexşand ku mûman li tenişta wêneyên wan şehîdan pêdixe. Min bi şêwazê xwe nexşandiye, wêneyê zarok bi meznahî derdikeve û ev tê wê wateyê ku mirov ji hemû tiştekî mezintire. Tişta herî giring di tabloyê de hêmaya hemû pêkhateyane. Her wiha wêneyê bûkê min kişandiye ku li gel xewna xwe ya pembeyî de difire.”