Ayşa Silêman/ Qamişlo
Endama Desteya Rêveber a Meclisa Sûriya Demoqratîk Daliya Henan diyar kir ku armanca êriş û planên li ser herêmê tên meşandin têkbirina projeya Rêveberiya Xweser e.
Piştî dagirkirina dewleta Tirk ji Efrîn, Girêsipî û Serêkaniyê re, li ber çavên herkesî ku çawa balefirên xwe yên bêmirov radike li ser asîmanê herêma Bakur û Rojhilatê Sûriyê, tevî ku ev yek zagonên navnetewî dişkîne, herwiha ev yek li gor zagonên navneteweyî zagonên şer e. Herwiha bi erêkirina dewleta Rûs û rêjîma Sûriyê jî ev êrîş tên kirin, dewleta Tirk van êrîşan pêk tîne di bin navê ku ewlehiya welatê xwe diparêze, lê çeteyên ku derbasî axa herêma Bakur û Rojhilatê Sûrî bûn bi riya dewleta Tirk re bûn, di heman demê de hemû xirabî, wêran, kuştin û koçberî û hemû êşên ku herêma Bakur û Rojhilatê Sûrî jiyan dikin, encama kiriyarên dewleta Tirkin.
Di derbarê geşedanên ku li herêma Bakur û Rojhilatê Sûrî tên kirin Endama Desteya Rêveber a Meclisa Sûriya Demoqratîk Daliya Henan ji Rojnameya me re axivî.
Êrîşên dagirkeriyê bandoreke neyînî li aboriyê dike
Daliya Henan diyar kir ku rojane dewleta Tirk li ser herêma Bakur û Rojhilatê Sûrî êrîşan dide meşandin. Sivîl, saziyên xizmetguzariyê, cihên sotemeniyê û sitasiyonên elekitrîkê armanc digre, di encama van de gel rastî gelek zehmetiyan tê, bi taybet di aliyê aborî de piştî qutbûna xaz, elekitrîk, mazot û avê, ji ber ku ev hemû pêdiviyên gel yê rojane ne û wiha got: “Di encama van êrîşan de hijmareke mezin ji karmendan bê kar man, ev yek hemû bandoreke neyînî li ser rewşa aborî ye herêmê dike. Dewleta Tirk dixwaze bi riya van kiriyaran gel tengav bike û vîna Rêveberiya Xweser têkbibe û gel li dijî rêveberiyê derkeve. Herwiha derî li ber koçberiyê vedike, da ku gel dev ji ax, çand û kevneşopiyên xwe berdin, ev hemû armancên
dewleta Tirke ku dixwaze bi riya wan sîstema Rêveberiya xweser vala derxê. Tevî ku gelek bangewazî ji aliyê gel ve tên çêkirin, çalakiyên şermezarkirinê û ji bo hemû saziyên mirovî û navdewletî jî bangewazî tê kirin. Lê tevî van yekan jî dewleta Tirk berdewam e, bi berdewam kirina vê rewşê re wê gelek zirarên neyînî bixwe re bîne, ji ber vê yekê divê ev yek çareser bibe.Herwiha cihên ku hatine dagirkirin rojane gel rastî işkencan tên û bi taybet jin, pirsgirêka herêma me bi pirsgirêka Sûriyê bi giştî ve girêdayî ye, divê çareseriyeke giştî ji bo alûziya Sûriyê re were dîtin, ji ber ku em jî parşeyek ji sûriyê ne, tu carî me xwe ji erdîngariya Sûriyê qutnekiriye.”
Pirojeya MSD’ê wê sîstema kapîtalîzmê têk bibe
Daliya Henan axaftina xwe berdewam kir û wiha got: “Li herêma bakur û rojhilatê Sûriyê Sîstemeke demoqratîk hatiye danîn û hîn jî berdewame, bi taybet piştî erêkirina hevpeymana civakî, rêgezên sereke yên sîstema demokratîk tên avakirin. Ji ber vê yekê dewleta Tirk û hemû hêzên ku berjewendiyên wan di berdewam kirina aloziya Sûriyê de hene, naxwazin li vir çareserî çêbibe, aramî û ewlehî avabibe, ji ber vê yekê zehmetiyên ku heta roja îro gel tê re derbas dibe, tu kes çareseriyê jê re nabîne. Ji bo çareserkirina pirsgirêka Sûriyê, gelek civîn, daxwuyanî û kongirên mezin hatin çêkirin, herwiha Cinêv, viyana û Asîtana gelek civîn li darxistin da ku çareseriyê ji pirsgirêka Sûriyê re bibînin, lê ji şûna çareseriyê bînin kirîz kûrtir kirin. Ji ber ku aliyên esasî yên Sûriyê pêwîste di van civînan de hazir bibin, yên ku xwediyên pirojeyên çareseriyê, wek; meclisa Sûriya Demokratîk, ji ber ku pirojeya ku me avakiriye, pirojeyeke pirrengî û demokratîk e. loma divê Sûrî hemû li hev bicivin û pirisgirêka xwe nîqaş bikin û çareser bikin, lê ji ber ku ev yek ne li gorî bercewendiyên kesên ku van civînan li dar dixin û naxwazin çareserî li Sûrî peyda bibe, vê piroje dûr dixin, heya roja îro ev êrîşên ku çêdibin, dixwazin vê pirojeyê tune bikin, ji ber ku ev piroje li beramberî sîstema kapîtalîzmê şerdike, heger ev piroje pêk were wê sîstema desthilatdarî dawî lê were.”
Hişyar bûna gel li hemberî kompiloyan
Endama Desteya Rêveber a Meclisa Sûriya Demoqratîk Daliya Henan dawî li axaftinên xwe anîn û wiha got: “Pêwîste pirojeya MSD’ê pêk were bi riyên diblomasî. Herwiha dive em xwe bighînin hemû aliyên Sûriyê da ku em vê pirojeyê bi wan bidin qebûlkirin, di heman demê de pêwîste hemû gel û pêkhateyên Sûriyê xwedî li vê pirojeyê derkevin. Herêma Bakur û Rojhilatê Sûrîyê, herêma herî bi ewle û gel ji sîstema Rêveberiya Xweser raziye, ji ber vê yekê em dibînin ku gelê Siwêda jî derketine qadan û daxwaza sîstemeke demoqratîk dikin. ji ber ku sîstema navendî nema dikare welatan bi rêve bibe, herwiha gelê Siwêda gihiştine wê yekê ku divê her kes nêrîna wî hebe ji bo avakirina pêşerojê, ev yek çareser dibe bi pêkanîna pirojeyeke demokratîk re. Herwiha banga me ew e ku her kes xwedî li pirojeyê ku MSD’ê pêşkêş kiriye derkeve, li beramberî êrîş û zehmetiyên heyî li ber xwe bidin, di heman demê de divê em bikaribin axa xwe jî biparêzin û herêmên ku dagir bûne rizgar bikin, herwiha li dijî şerê taybet yê ku dixwazin li ser ciwan û civakê me bidin meşandin bi sekinin, em hişyar bin beramberî hemû kompiloyên heyî ji berk u dagirker dixwazin bi riya siyaseta xwe ya qirêj re civakê pûç bikin, di encamê de sîstema Rêveberiya Xweser hilweşînin.”
