Projeyên Şaredariya Gel ya bajarê Qamişlo yên sala 2023`an ku ji ber sedemên avhewayê hatibûn sekinandin, careke din dewam dikin. Rêveberê Ofîsa Fenî ya Şaredariya Gel ya bajarê Qamişlo Ednan Ehmed diyar kir ku ji bo xizmeta civakê wê kar û xebat berdewam be.
Lîloz Hisên/ Qamişlo
Bi hatina werzê zivistanê, şaredariya Gel ya bajarê Qamişlo hin projeyên xwe yên xizmetguzariyê yên wekî çêkirina riyan yên sala 2023’an da sekinandin, bi destpêkirina bihara 2024’an şaredariyê careke din dest bi xebatên qedandina van pirojeyan kir.
Derbarê mijarê de Rêveberê Ofîsa Fenî ya Şaredariya Gel ya bajarê Qamişlo Ednan Ehmed ji rojnameya me re axivî û wiha got: “Ji ber sedemên avahewayî xebatên projeyên sala 2023`an hatibûn sekinandin û tenê bi pileya ji sedî 40 hatin pêkanîn. Lê bi başbûna avhawayî û bi hatina werzê buharê di sala 2024`an dîsa şaredariyê dest bi xebatên xwe
kir.”
Ehmed wiha axaftina xwe dewam kir: “Me xebatên xwe bi berdewamkirina danîna kevirên şikestî li taxên bajarê Qamişlo yên mane destpê kir ku bi mîqdara 5hezar M3 bû. Projeya me ya nû destpêkirina danîna kevirên şikestî li taxa Hilko ye. Piştî bi dawîbûna vê taxê wê şaredarî dest bi taxên cuda bike weke beşa rojhilat û taxên cuda ji bajarê Qamişlo. Herwiha piştî bidawîbûna projeya danîna kevirên şikestî li taxan piştî demeke din wê bên ziftkirin. Ji xebatên projeyên me jî rêyên ku xirabbûne, ne rastin û gelek çal tê de hene wê bên sererast kirin û kevirên şikestî bên danîn.”
Ednan Ehmed derbarê projeyên 2024’an wiha got: “Gelek projeyên me yên din hebûn weke projeya qîrkirinê bi mîqada 6hezar M3 hat pêkanîn û bi temamî proje bi dawî bû. Li bazara sebzeyan jî projeya kevirên enterlokê hat pêk anîn.
Projeyên sala 2024`an wiha ne; Projeyên pêşerojê yên hatine hildan ji bo bên pêkanîn (Dergeha rojhilat a bajarê Qamişlo, xetên avê û binesaziya herêmê) bi giştî ye her wiha projeya ziftkirinê. Herwiha 2 şaredarî girêdayî şaredariya Qamişlo hene, şaredariya Tenûriyê û Girbawî, projeyên şaredariya Girbawî bi temamî hatin pêk anîn beşek ji hêla şaredariya me û beşa din ji taybet hat pêk anîn. Şaredariya Girbawî projeya danîna kevirên şikestî beşeke jê gihaştin ji sedî 40.”
Ednan Ehmeddi dawiyê de wiha got: “Weke şaredariya Qamişlo em kar û xebatê xwe dikin û projeyên sala 2023`an berdewam dikin û li hêviyê ne ku erêkirin bê dayîn ji bo projeyên sala 2024`an dest pê bikin.”
