Ayşa Silêman / Qamişlo
Rojnemevana Ajansa ANHA’yê Hêlîn Asmîn diyar kir ku dijminên gelê kurd dixwazin bi riya armancgirtina jinên rojnemevan, jinên azad bêdeng bikin û wiha got: “Bi riya hedefgirtina jinên rojnemevan dixwazin rastiyê veşêrin û îradeya jinên azadîxwaz têk bibin. Her Nûjiyanek şehîd bibe, wê bi hezaran Nûjiyan şopa wê dewam bikin û armanca wê pêk bînin.
Di derbarê jiyana Şehîd Nûjiyan Erhan, herwiha kar , xebat û salvegera Şehadeta wê rojnemevana Ajansa ANHA’yê Hêlîn Asmîn bersiva pirsên rojnameya me da û hevpeyvîn wiha bû:
Hûn dikarin kesayet, kar û xebatên Şehîd Nûjiyan Erhan bînin ziman?
Nûjiyan Erhan di sala 2015’an de demekî li herêmên Zagrosê û li çiyayên Kurdistanê dimîne, paşê derbasî çapemeniyê dibe, derbasî akademeya Gurbet Elî Ersûz dibe, piştî derbasbûna wê ji akadimiyê re derbasî Navenda Rajinê ya bingehîn li Çiyayên Kurdistanê dibe. Nûjiyan Erhan him Gêrîlatî dikir him jî rojnemevantiyê dikir, demeke dirêj di milê dîtbar, nivîskî de kar kir. Dixwest danasîna gêrîlayên jin bide diyarkirin bi riya çapemeniyê re, ji ber vê yekê wêneyên gêrîlayên jin û çîrokên wan pêşkêş dikir. Bi vî rengî karê xwe di çapemeniyê de dida meşandin, heta sala 2014’ an feremana Şengalê çêbû. Dema Fermana 73’an li Şrngalê çêdibe, heval Nûjiyan Erhan wek rojnemevaneke jin ya yekemîn bi ekîpekî re derbasî Şengalê dibe. Nûjiyan derbasî Şengalê bû, ji ber ku dixwest ew jinên ku di ferman û komkujiyan de êş kişandine û hatine tecawiz kirin, bi riya Çapemeniyê re van jinan ji Cîhanê re bide naskirin. Heta niha 73 ferman li Şengalê
hatine kirin lê heta niha belgeyeke yan dîmenek fermî di dîrokê de nîne, lê Nûjiyan Erhan û hevalên xwe bi riya Çapemeniyê re ferman 73’an ya Şengalê bi cîhanê dan naskirin. Heval Nûjiyan erkê wê yê bingehîn ew bû, ku di şengalê de ragihandina jin avabike. Jin û ciwanên Şengalê jî dibêjin ku Ş. Nûjiyan ji me re bû hêvî, herwiha Nûjiyan Erhan bingeha ragihandina azade û çapemeniya jin da avakirin. Di heman demê de yek bi yek bi ciwanên Şengalê re mijûl bû û kar kir, heta niha li Şengalê Rojnemevanên jin li ser xeta Ş. Nûjiyan dimeşin û wê wek pêşenga xwe pênase dikin. Her sal dema salvegera heval Nûjiyan jinên Şengalê wê bibîr tînin. Raste demeke kin ez û heval Nûjiyan bi hev re man, lê min dît heval Nûjiyan çiqasî çalak bû, çi kar ketiban pêşiya wê digot ez ê bikim wek; Dîtbar, pêşkêşî, ji kovar û rojnameyê re nivîs dinivîsandin, ji ajans û televisyonê re nûçe çêdikirin û rêveberiya çapemeniya jin jî dikir, di heman demê de bernameyên pêşkêşî çêdikir, herwiha jinên ciwan fêrî karê ragihandinê dikirin. Bi riya heval Nûjiyan bingehek xurt ji bo jinan li Şengal hat avakirin.
Çima PDK’ê Şehîd Nûjiyan Erhan hedefgirt?
Ji avabûna ragihandina jin yan ragihandina azad heya roja me ya îro, êrîşên dagirkeriyê li ser jin û çapemeniyê hene, di heman demê de jinên kurd berxwedanî û têkoşîna wan heye. Ji Gurbert Elî Ersûz heta ya herî dawî Rohendayan re. Herî dawiyê li Zapê 4 hevalên çapemeniya YJA Star şehîd ketin. Ev tê wateya ku hemû heman zihniyetin, zihniyeta ku heval Nûjiyan Erhan li Şengalê şehîd xistî û zihniyeta ku Nagîhan Ekarsa û Denîz Firat şehîd xistin heman zihniyetin. Armanc wan ji vê yekê naxwazin rastiya wan eşkere bibe, bi êrîşên xwe dixwazin hebûna xwe diyar bikin, herwiha dixwazin jinên azad bêdeng bikin. Bi riya kuştin û tunekirin dixwazin dengê ragihandin, çapemenî û dengê jinê tunebikin. Heger Nûjyanek hat qetilkirin di heman demê de bi hezaran Nûjiyan şopa wê berdewam dikin. Em jî heta roja îro li ser wê xetê dimeşin.
Hûn wekî rojnamevan, kiryarên PDK’ê yên wekî kuştin , revandin û işkencekirina rojnemevanên dengên azadiyê çawa dinirxînin?
Revandina Silêman Ehmed, dewama zihniyeta girtin û revandina bi hezaran girtiyên din yên Bakurê Kurdistanê ye, ev zihniyet nahêle ji bilî deng, reng û hebûn wî tiştek hebe. Dixwazin bi riya girtin, kuştin û ji derveyî qanûnê jî hin gavan diavêjin. Girtina Silêman Ehmed û şehîdxistina Nûjiyan Erhan û heta roja îro girtina bi dehan rojnemevanên kurd, ev yek ji hev venaqetin, ji ber ku pergala desthilatdar naxwaze tu deng ji yê wan pêve pêşbikevin. Ji ber vê yekê êrîşên xwe dûbare dikin, herî dawî li Bakurê Kurdistanê bi hezaran rojnemevan hatin girtin û hatin berdan jî, lê ya Silêman Ehmed her tişt ji derveyî hiqûqî tê meşandin, îro PDK’ê Silêman Ehmed revandiye ne qanûn û ne jî mafên wî tên naskirin, ne jî pîvanên wî yên rojnemevantiyê. Zihniyeta ku rojane li Başûrê Kurdistanê li ser kurdan kuştin û dijminatî tê kirin. Herwiha ev yek bi girtina Silêman Ehmed ve girêdayî ye, tevî ku rojane parêzer serlêdana wî dikin û Roj Newz bi dehan daxuyanî dan û rojnemevanên cîhanî jî serlêdana Silêman Ehmed kirin, lê heta niha PDK’ê hebûna wî pênase nakin û cihê wî jî diyar nakin ji malbata wî re. Girtina Silêman û qetilkirina Zelal Zagiros ev zihniyeta desthilatdar ya hev pare ji hev qutnabe, herwiha zihniyeta ku îro Erdogan, PDK’ û hêzên desthilatdar dixwazin bidin meşandin yek zihniyete. Li hember vê yekê mirovên lêgervan û bi taybet lêgervanên heqîqetê tu carî serî natewînin, heval Nûjiyan Erhan, Gurbet Elî Ersûz û Denîz firat, herwiha bidehan rojnamevan di zindanan de li ber xwedidin û serî li ber desthilatdariyê natewînin û tekoşînê dikin. Li ser rêka heqîqetê bi pênûs, ked û wênekêşa xwe dixwazin rastiya heyî derxin holê û ji vê rastiyê dûr nakevin. Em jî wek rojamevan em ê li ser xeta wan bimeşin û heta dawiyê em ê li ser xeta wan meşa xwe berdewam bikin.