Jinên êzidî yên Efrînê diyar kirin ku her hêzeke ku dixwaze nasnameya gelekî ji holê rake, di serî de êrîşî jinan dikin. Jinanên Êzidî yên Efrînê destnîşan kirin ku wê têkoşîna xwe mezin bikin heta Efrînê rizgar bikin.
Jinên êzidî yên Efrînê têkildarî salvegera 4‘emîn a qirkirina Êzidiyan axivîn.
Leyla Şamo komkujiya li dijî gelê kurd ê Êzidî bi bîr anî û wiha axivî: “Gelê Şengalê beriya 4 salan rastî êrîşeke hovane ji aliyê çeteyên DAIŞ‘ê ve hat. Gelek hêzan piştgirî dan vê êrîşa li hovane ya li ser Şengalê. Ji ber çand û baweriya gelê Êzidî ditirsin êrîş dikin. Hewl didin bi êrîşan civaka Êzidî tune bikin.”
Xatûn Ebdo bal kişand ser hevkariya çeteyên DAIŞ’ê û dewleta tirk û kiryarên wan ên li dijî jinan û wiha pê de çû: “Dagirkeriya Tirkiyê û çeteyên wê li Efrînê berdewam dike. Tirkiye bi awayekî eşkere destekê dide komên çete da ku gelê kurd bi giştî û Êzidiyan tune bikin. Lewre divê civaka navdewletî, raya giştî hesabê komkujiya Şengalê bixwaze û dagirkeriya Tirkiyê ji Efrînê derxin beriya ku komkujiyeke din li dijî gelê Êzidî pêk were.
Qiret Betal îşaret pê kir ku êrîşên artêşa tirk a dagirker û çeteyên wê yên li ser Efrînê berdewama komkujiya jinên Şengalê ye û wiha got: “Êdî jinên Efrînî asta hovîtiya dagirkeriya Tirkiyê û çeteyên wê nas kirin, ji ber vê yekê ji Efrînê derketin da ku nekevin destê wan. Em ê têkoşîna xwe berdewam bikin heta Efrînê ji dagirkeran rizgar bikin.”
Em ê dagirkeran ji Efrînê derxînin
