Stranên Keziya Sor

Fîlmê Muzîkal ê bi nave Stranên Keziya Sor ku dîroka têkoşîna jinan a cîhanê ya dijî baviksalariyê vedibêje, di destpêka Adarê de tê pêşandin.   

Tevgera Çand û Hunera Jin a Hîlala Zêrîn, bi hevkariya Tevgera Çand û Hunerê ya Mezopotamyayê, Saziya Çandê ya Pargîn û Hunergeha Welat, li ser dîroka têkoşîna jinan a cîhanê fîlmekî muzîkal çêkir.

Fîlmê Muzîkal ku li Bakur û Rojhilatê Suriyê cara yekem tê çêkirin, bi navê, “Stranên Keziya Sor” hatiye amadekirin.

Li gorî agahiyên ku Endama Hunergeha Berçem a Hîlala Zêrîn Zeyneb Mensûr dan kesayet û têkoşîna yek ji damezirînerên PKK’ê û pêşenga têkoşîna azadiya jinê Sakîne Cansiz ku 9’ê Çileya 2013’yan li Parîsê di êrîşa sîxurên Tirk de şehîd bû, wekî îlhama navê fîlmê muzîkal hatiye bijartin. Pora Şehîd Sakîna Cansiz sor û keziyên wê bedew bûn; di çanda Kurdan de jî kezî xwedî wate û giringiyekê ne, lewma navê “Stranên Keziya Sor” hatiye diyarkirin.

7 serdemên dîroka têkoşîna jinan vedibêje

Filmê muzîkal ji 7 beşan pêk tê; her beşek serdemeke dîroka têkoşîna jinan a cîhanê ya li dijî hişmendiya baviksalariyê vedibêje û wekî sembol balê dikişînin ser jinên pêşeng ên weke Sakîne Cansiz (Sara), Roza Luksemburg, Jîna Emînî, Zenûbya, Arîn Mîrkan, Leyla Qasim û Zarîfe Xanim.

Di 7 mehan de bi beşdariya 200 jinan hatiye amadekirin

Zeyneb Mensûr diyar kir ku fîlmê muzîkal di 7 mehan de bi beşdariya 200 kesan hatiye amadekirin. Zeynep Mensûr da zanîn ku mêran jî di lîstikê de cîh girtiye, lê piraniya lîstikvanan jin in. Zeyneb diyar kir ku lîstikvan ji pêkhateyên Kurd, Ereb, Suryan, Ermen ên ji Bakur û Rojhilatê Suriyê, parçeyên din ên Kurdistanê û hinek enternasyonalîstan pêk tên. Zeyneb Mensûr anî ziman ku dîmenên ji bo muzîkalê li Herêma Bakur û Rojhilatê Sûriyê kişandine hatine kişandin.

Berhema ku senaryoya wê ji aliyê Delîl Mîrsaz ve hatiye nivîsandin û muzîka wê ji aliyê Mehmûd Berazî ve hatiye çêkirin, 20 deqeye û Şêro Hindê derhêneriya wê dike.

Muzîkal wê 3’yê Adarê li Hesekê, Qamişlo, Reqa, Kobanê û Şehbayê bi hemwextî bê pêşandan. Heman rojê wê di Jin Tv’de jî bê weşandin.