Birûc Resûl/Qamişlo
Li hola zana ya bajarê Qamişlo, salvegera 4`emîn a mîrê bizqê hunermendê nemir Seîd Yusif hate bibîranîn.
Hunermendê Kurd, mîrê bizqê Seîd Yûsif di salvegera 4ʹemîn a koça xwe ya dawî de, li Qamişlo hat bibîranîn. Bîranîn bi beşdarbûna bi dehan şîniyên bajarê Qamişlo, di navde hunermend, rewşenbîr, malbata hunermend Seîd Yûsif, nûnerên Rêveberiya Xweser û Desteya Çandê ya Herêma Cizîrê li Hola Zana hat lidarxistin.
Bîranîn bi deqeyekê rêzgirtinê li ser giyanên şehîdan hate destpêkirin. Piştre li ser navê malbata Seîd Yusif, Şepal Yûsif di destpêka axaftina xwe de spasiya beşdaran kir û wiha got: “Ezê şopa bavê xwe bişopînim. Herwiha bavê min wefedarê gelê xwe, çand û zimanê kurdî bû.
Di heman demê de li ser navê Yekîtiya Nivîskaran Şemis Entir diyar kir ku hunermend Seîd Yûsif mohra xwe li helbest û mûzîka kurdî xist û wiha domand: “Koça kesên mîna Seîd Yûsif ji bo Kurdan windahiyeke mezin e. Ji ber ku van kesan jiyaneke nû ji bo gelê xwe ava kirin. Awaz û stranên wan wê timî zindî bimîne.”
Herwiha li ser navê Yekîtiya Nivîskarên Suriyê Ebdqadir Egîd da zanîn ku hunermend Seîd Yûsif û hemû kesên ku ji bo azadiya Kurd û Kurdistanê berdêlên giran dane, bi bîr anîn û got: “Hunermendê navdar Mîrê Bizqê Seîd Yûsif di nav çivaka kurdî de bi hestên stranên xwe yê neteweyî û welatparêzî êş û derdê miletê kurd gihande cîhanê. Herwiha hunermendê kurd Seyîd Yûsif ji bona ziman,çand û hunera Kurdî pêşbikeve her tim kar û xebat dikir û di vê derbarê de gelek berhemên wî hatin tomar kirin û bûne malê gelê Kurd û dîrokê. Di warê hunera kurdî de bi nivîsandin, stran û bi saz û awazên xwe, yê ku her dem di dilê kurdan de wê zindî bimîne cihekî xwe hişt.”
Piştre lîkolînerê zimanê kurdî Deham Ebd Fetah ji aliyê malbata Seîd Yûsif ve hat xelatkirin.
Di merasîma bîranînê de sinevîzyonek li ser rêwîtiya hunermend Seîd Yûsif hat pêşandan. Di dawiya merasîmê de jî hejmarek hunermendan wekê Sîmav Darî, Şiyar Darî, Lawîn Yusif û Sefqan Orkêş stranên Seîd Yûsif gotin.
Hêjayî bibîrxistinêye ku di 26`ê Sibata 2020`an de berî 4 salan, hunermendê kurd Seyîd Yûsif li nexweşxaneyeke Tirkiyê ji sedema nexweşiya Penceşêrê jiyana xwe ji dest da û di 29`ê Sibata 2020`an de cenazeyê Hunermend Seyîd Yûsif derbasî Rojava bû û bi merasîmeke bi heybet ji aliyê milet, kesayetên siyasî, rewşenbîr û hezkiriyên xwe ve hate pêşwazîkirin û li goristana Qidûrbek, hate oxir kirin.
