Festîvala Mîtan dengê berxwedanê li hember dijmin bilind kiriye. 5’emîn Festîvala Mîtan di roja xwe ya yekemîn de îradeya gelê berxwedêr ji tavahî cîhanê re raber kir û li ser dika şanoyê êş, hezkirin, berxwedanî, zihniyeta desthilatdaran û hêza baweriyê îfade kir.
Zana Roj/ Şehba
Festîvala Mîtan a 5’emîn bi dirûşmeya `Veger Nêz E, Bi Hêvî Ne` li herêma Şehbayê di dîroka 10 ê heyvê de hat destpêkirin. Ev festival weke yekemîn festîvala şanoyî li ser asta Bakur û Rojhilatê Sûriyê tê pênasekirin. Di nava xwe de mijar û şanogerên derveyî herêma Efrînê dihewêne. Di
Mîtan 5 de mêvanên ji Başûrê Kurdistanê Kerkuk, Reqa, Hesekê û Kobanê beşdar bûne. Bi van mijar û pir rengbûna herêm û pêkhateyan Mîtan 5 tavahî sênorên dorpêçê dişkîne û careke din ji cîhanê re îradeya gelê xwedî doz nîşan dide.
Di 11’ê mehê de weke roja yekemîn ya vekirina festîvalê bû û bi rengê şano û hunerî li hola çand û hunerê bi beşdarbûna bi sedan ji gelê herêmê Festîval hat berdan. Têkildarî Festîvala Mîtan 5 emîn Şanoger û yek ji komîteya amedekar ya Mîtan Zêneb Mihemed her wiha şanogerê ku rol di Mîtan 5 de girtiye Mîlad Yehye ji rojnameya me re axivîn.
`Mîtan zayîneke nû bû`
Zêneb destnîşan kir ku ew ji Efrînê de cihê xwe di Mîtan de digire û wiha pê de çû: “Di sala 2014 an de bi avakirina Rêveberiya Xweser re Mîtan yekemîn car li Efrînê hat amedekirin. Mîtan weke ji nû ve ji dayîkbûnê bi zimanê dayîkê şano çêkirin, huner avakirin û derketina li pêşberî gelê xwe hat dîtin. Ew gavên ku hatine avêtin bni hezkirineke mezin di welatekî azad de hatin avêtin. Yekemîn car bêyî tirs em derdikevin ser dike û bi rengê xwe çanda xwe pêşkêşî cîhanê dikin. ji
Mîtan 1 de ez cihê xwe weke şanoger tê de digirim, 3 festîvalên Mîtan li Efrînê hatin li dar xistin. ew ji bo me weke şoreşeke çandî û şanogerî dihat dîtin. Her sal bi fikir, mijar û afrîneriyên zengîntir em derdiketin pêşberî gel. Lê mixabin dijmin bi êrîşên xwe Efrîn dagir kir”.
`Bi silogana em diçînin jiyanê em ê jiyanê geş bikin`
Zêneb anî ziman ku bi dagirkeriyê û koçberiyê re hestên nû hatin afirandin û Mîtan bû rengê berxwedanê dest pê kir û wiha got: “Piştî fermana ku li ser Efrînê hatiye rakirin, bê guman em bi jiyaneke zor û zehmet re rû bi rû man. Gotina koçberî bi sere xwe hemû êş û eleman dide îfade kirin. lê weke ku çawa gelê me bi îradeyeke mezin jiyan da avakirin. Festîvala Mîtan jî bi silogana xwe ya fermî `Em Diçînin Jiyan` jiyan ji nû de geş kir û bi Mîtan 4 û 5 derket. Bi vê gavê festîvala Mîtan bi hestên nû derketin pêş û bi rengê berxwedanê hat xemilandin. Li ser vî esasî Mîtan 5 emîn bi hêviya vegera Efrînê hat destpêkirin”.
`Armanca Mîtan di Şehbayê de hate cih`
Zêneb di axaftina xwe de diyar kir ku Mîtan 5 armanca ku di Efrînê de pêk neaniye di koçberî û dorpêçê de anî cih û wiha bi dawî kir: “Armanca ku Mîtan pê hatiye destpêkirin ew bû ku bibe festîvaleke navnetewî û Kurdistanî. Lê bajarê Efrînê ji ber qutbûna wê ji herêmên din re weke cografî di dorpêçê de bû. Niha li herêma Şehbayê Mîtan ew armanc û xeyalên xwe di rewşeke hê zehmetir de pêk anî, ew jî tevlîbûna giropên ji herêmên din e. ku em bikaribin armanca Mîtan ya ku huner, çand û rengê gelan di nava xwe de bihewîne pêk bînin. Bi rastî cudabûna Mîtan 5 ji festîvalên derbasbûyî gelkî cuda ye, me karî rûxmî dorpêçê jî Mîtan bibe festîvala yekemîn ya şano li ser asta Bakur û Rojhilatê Sûriyê”.
`Em ê destkeftiyên Mîtan biparêzin`
Her wiha şanogerê bi navê Mîlad ku yekemîn car e cihê xwe di Mîtan de digire anî ziman ku Mîtan ji bo wî pîroze û wê Mîtan bikin name û pêşkêşî cîhanê bikin û wiha got: “Ev bû 2 mehin ez cihê xwe di nava perwerdeya festîvalê de digirin, her wiha ev yekemîn car e ez beşdarî Mîtan dibim. Mîtan ji bo min tiştekî pîroz e û divê em wê biparêzin, cawa ku Mîtan gihîştiye vê astê em ê jî weke nifşên nû vê destkeftiyê biparêzin. Mîtan di nava xwe de gelek mijaran dihewîne û wan mijaran weke name pêşkêşî cîhanê dike. Bi vê hezkirinê û armancê emê riya Mîtan daye destpêkirin berdewam bikin”.
