Germiyan wek navenda hunerê tê zanîn û bi salane vê hunerê nasnameya Kurdî parastiye û bûye bingehê şoreş û rastiya gel. Hunermend û meqambêj Behmen Kakeyî da zanîn ji bo hunera biyanî cihê hunera Kurdî negire, divê hunera Kurdî were bihêzkirin. Kakeyî got, çand û huner nasnameya netew û bingehê şoreşa ne.
Hunermend û meqambêj Behmen Kakeyî di derbarê giringiya hunerê bi taybetî jî meqambêjiyê ku wek bingehê hunerê tê zanîn, axivî.
Behmen Kakeyî di destpêka axaftina xwe de diyarkir ku Germiyan wek landika meqambêjî û hunera resene û got: “Çanda Kurdî û meqambêjî li bajaroka Kifrî pêşketiye. Meqamên ku taybetin bi herêma Germiyan bi awayek giştî girêdayî baweriya Yarsanin. 500 sal beriya niha nîva şêniyên bajaroka Kifrî Kakeyî bûn. Lê bi hatina Osmaniyan re Kakeyî hatin çewisandin û ji Kifrî hatin koçberkirin. Lê heta niha jî bermahiyên wan mane, Bawe Şasiwar jî yek ji van mînaka ye.”
Kakeyî da zanîn huner li her cihekî koka xwe avêt bandora wê bi sedan sal li wê derê dimîne û wek mînak jî got: “Hunerê kariye çand, ziman û wêjeya Kurdî biparêze. Huner û helbestên klasîk bûne sedema parastina zimanê Kurdî. Li her cihekî netewek rûbirûyê dagirkeriyê dibe, dagirker destpêkê hewl dide koka hunerê tine bike. Lê çand û huner ti demê ji ber dagirkeran tine nabe.”
Di derbarê dagirkeriya li ser çand û hunera Kurdî jî Behmen Kakeyî got: “Banga min ji bo Hikûmeta Herêma Kurdistan, Wezareta Rewşenbîrî û hunermendên Kurd ewe ku çalakiyên hunerî li Kurdistanê lidarxin. Daku dagirkeriya li ser hunera Kurdî nemîne. Ger hunermend û şanogerên Kurd nikaribin film û şanoyên Kurdî bihêz pêşkêş bikin, wê hunera biyanî cihê wê bigre.”
Li ser pirsa çi peywendiya huner û şoreşê bi heve heye, Behmen Kakeyî got: “Di şoreşan de huner rolek mezin lîstiye. Sirûdên hunermendên wek Heme Ceza û Nasir Rezazî hestên netewî yên bi sedan ciwan bilind kiriye. Şoreşa bê huner mîna dar û bostanek av li ser hatî qutkirine. Ji ber wê huner bingehê hemû şoreşane.” ROJNEWS
