Dilîn Ehmed/Qamişlo
Bi diruşmeya “Bi Hêz û Vîna Jinên Ciwan Emê Hemû Cureyên Tundiyê Têk Bibin” jinên ciwan yên Partiya Yekîtiya Demokrat (PYD) bi tevlîbûna jinên ciwan yên Rojava, semînerek li dar xistin.
Îro di saetên sibehê de li navenda Partiya Yekîtiya Demokrat (PYD) ya bajarê Qamişlo jinên ciwan bi armanca têkbirina tundiya li ser jinê bi tevlîbûna bi dehan jinên ciwan li ser asta Bakur û Rojhilatê Sûriyê bi diruşma “Bi Hêz û Vîna Jinên Ciwan Emê Hemû Cureyên Tundiyê Têk Bibin” semînerek li dar xistin.
Semîner bi xuleyeke rêzgirtin li ser giyanê şehîdan, dest pê kir. Bi gotina Hevseroka Partiya Yekîtiya Demokrat (PYD) Berwîn Yûsif, semîner dest pê kir. Perwîn Yûsif diyar kir ku divê jinên ku bi pêşengtiya wê Şoreşa Rojava hat lidarxistin, hemû cureyên tundiyê yên li ser jinan tê meşandin, bi hêz û têkoşîna xwe têk bibin.
Herwiha Perwîn got, divê em bibin dengê şehîdên xwe yên jin û xeyalên wan yê azadkirina jinan bi cî bînin. Divê em bi kar û xebatê xwe pêşeroja xwe diyar bikin û li hêviya ti kesî yan ti hêzê nemînin.
Hevseroka Partiya Yekîtiya Demokrat (PYD) Berwîn Yûsif di axaftinên xwe de balkişand ser tunekirina rola jin di Sûriya nû de û got: “Piştî bi dehê sala ku gelê Sûrî bi taybetî jin ku ji mafê xwe yî jiyanî hatibû bêpar kirin, ew jî ji ber rejîma Esed ku rejîmeke şofînî bû, niha bi hatina desthilada Şamê ya nû, rejîmeke olperestî hat destpêkirin. Li hember van siyasetên qirêj ku dixwazin rola jinê di civakê de qir bike, ya herî pêwîst û girîng, pêşxistina têkoşîn û berxwedana jinên ciwan ne.”
