Ji bo cara yekemîn jinên Ereb li Şengalê dewreya Perwerdeya Şehîd Hebûn Ereb li Akademiya Şehîd Rojbîn bi şahiyekê bidawî kirin. Di şahiyê de 45. Salvegera Damezirandina PKK’ê jî hate pîrozkirin û daxwaza azadiya Rêber Ocalan hate kirin.
Li Şengalê hemû pêkhateyên herêmê bi armanca xwe rêxstinkirina li ser
pergala neteweya demokratîk xebatên perwerdeya fikrî didomînin. Vê carê 15 jinên ciwan yên gundê Bîrcarî yê herêma Ereba ya Şengalê dewreyek ya perwerdeya fikrî biserkeftî bidawî kirin.
Dewreya perwerdeyê binavê Şehîd Hebûn Ereb li Akademiya Şehîd Rojbîn hate dayîn. Perwerdeyê 15 rojan berdewam kir.
Dewreya yekemîn a ku hatibû destpêkirin bi dawî bû. Bi dawîkirina dewreya perwerdeyê 45’emîn salvegera damezrandina PKK’ê jî hate pîrozkirin û banga azadiya fîzîkî ya Rêberê Ocalan hate kirin.
Şahiyê bi deqeyek rêzgirtinê destpê kir û pişître li ser navê dewreya Şehîd Hebûn Ereb, Zîna Adil axivî. Zîna dewreya perwerdeyê li tevahiya jinên ereb pîroz kir û da diyakrin ku bi saya fikrên Rêber Apo ew dikarin li ser azadiya jin û pêkvejiyana gelan perwerdeya bibînin. Herwiha ji bo pêşxstina perwerdeyê banga tevlîbûnê li tevahiya jinên Ereb kir.
Herwiha li ser navê Meclisa Jin ya Herêma Ereban jî Ewêşe Muhed axivî. Ewêşe salvegera damezrandina PKK’ê pîroz kir û destnîşankir ku ew wek gelê Ereb minetdarên Rêber Apo ne û got; “Ji ber ku wî hiştiye ku em jin karibin li ser lingên xwe bisekinin û bibin xwedî îradeya xwe. Lewra em dixwazin Rêber Ocalan bi awayek fîzîkî azad bibe.”
Herî dawî jina cawan ku beşdarî dewreya perwerdeyê bûye got: “Ev perwerde ji bo tevahiya civakê girînin, ji ber ku bi perwerdeyê em xwe nas dikin û dikarin bibin xwedî îradeya xwe. Ev îradeya me ya ku hatiye avakirin bi saya fikir û ramanê Rêbertiya me ye. Pêwîste em jî li Rêber Apo xwedî derkevin.”
Piştre govenda azadiyê hate gerandin û piştî govendê şahiya bidawîbûna dewreya perwerdeyê bidawî bû.