Ronaz Silêman/Qamişlo
Di Yekemîn Festîvala Çandî û Hunerî ya bi navê Netewa Demokratîk ku li navçeya Til Birak ya girêdayê bajarê Hesekê hat Iidarxistin, jin bi çand û kevneşopiyên xwe mîna keskesorê cihê xwe di nava festîvalê de girt. Jinên beşdarvan diyar kirin ku armanca wan zindîbûna çanda tevahiya pêkhateyan e.
Di Festîvala Yekemîn a Çand û Hunerî ya Herêma Cizîrê ku li navçeya Til Birakê ya girêdayê bajarê Hesekê, bi dirûşmeya ‘Bi ruhê Neteweya Demokratîk em ê Bakur û Rojhilatê Sûriyeyê biparêzin û azadiya fîzîkî ya Rêber Abdullah Ocalan misoger bikin’ hat li darxistin, jinên hemû pêkhateyan bi çand, kevneşopî, xwarin, cil û bergên xwe yên cûda mîna keskesorê cihekî taybet di festîvalê de digirtin. Armanca sereke ji festîvalê ew e ku her pêkhateyek kevneşopiyên xwe zindî bikin.
Derbarê rol û asta tevlîbûna jinan di Festîvalê de, jinên beşdarvan ji rojnama me re axivîn.Endama Meclisa Civaka Ermenî ya Çandî Mêlêna Qesabiyan diyar kir ku armanca wan
ji tevlîbûna festîvalê ew e ku ji cîhanê re bidin xuyakirin ku hîn neviyên Ermeniyan hene û wiha got: “Koma Ertisax bi 3`ê dîlanên cûda ku tê de li ser hêza Ermeniyan, bedewiya jinên Ermenî û misogeriya hêza Ermeniyan nîşan dide, di festîvalê de beşdar bûn. Ji derveyî dîlanan, di festîvalê de em ê, rêûresmên hinê, koral, xwerinên Ermenî, cil û bergên Ermeniyan jî pêşkêş bikin. Armanca me ji van dîlanan ew e ku ji cîhanê re nîşan bidin ku gelê Ermen tevî hemû zoredestiyan jî hîn hene. Herwiha bi hêza xwe em ê ziman û çanda xwe biparêzin.
Festîval mîna tabloyeke cihreng e ku çandên cûda bi rengîniya xwe tevlî bûne.”
‘Armanca me zindîkirina çandê ye’
Endama navenda Çand û Hunerê ya navçeya Şedadê jî Rîham El Hemûd da zanîn ku berî lidarxistina festîvalê, wan amedakarî jê re kirin û wiha got: “Berî lidarxistina festîvalê amadekariyên me jê re hebûn. Herwiha di festîvalê de em ê helbest û çanda xwe pêşkêş bikin.
Armanca me çanda navçeya Şedadê û çanda tevahî herêmê di nava civakê de zindî bikin. Herwiha em kêvxweşin bi vê festîvalê, ji ber ku ew weke rengê keskesorê ye ji tevahî pêkhateyan tevlî bûne û her navçeyek çanda xwe ya kevnar pêşkêş dike.”
‘Beşdarbûna jinê tekezkirina vîn û hêza wê ye’
Di heman çarçoveyê de endama koma Şehîd Sosin a jinan ya Til Temirê Lava Mihemed da xuyakirin wan di vê festîvalê de xwe da isbatkirin û wiha got: “Koma me ev 7 salin ku hatiye avakirin. Tevî em di navçeyeke ku rojan êrîş li ser wê tên kirin, lê em niha di vê fistîvalê de, xwe didin isbatkirin ku em ê bi hemû awayan li hemberî van êrîşan rawestin, çi bi berxwedaniyê be çi bi kevneşopiyên me bin. Ji xwe di nava festîvalê de em ê dîlanên kurdan pêşkêş bikin, armanca me ew e ku em govenda kurdan bi pêş bixin û kevneşopiyên kurdan belav bikin. Koma me ji 12 jinan pêk tê. Tevlîbûna jinê di estîvalê de, isbatkirina hêz û vîna jinê ye