Birûc Resûl/Qamişlo
Desteya Çand û Hunerê ya Herêma Cizîrê, bi durşmeya ‘Em ê Bi Rihê Çanda Netewa Demokiratîk Bakur û Rojhilatê Sûriyê Biparêzin û Azadiya Fîzîkî ya Rêber Apo Mesoger bikin’, Yekemîn Festîvala Çandî û Hunerî ya Netewa Demokratîk li navçeya Til Birak li dar xist û festîval 2 rojan dewam dike.
Bi Yekemîn Festîvala Çandî û Hunerî ya Netewa Demokratîk li ser asta herêmê tê li dar xistin.
Bi armanca parastina kevneşopiyên çand û hûnerî yên hemû pêkhateyên bakur û rojhilatê Suriyê, bi pêşengiya Desteya Çand û Hunerê ye Herêma Cizîrê, bi dirûşmeya ‘Bi ruhê Neteweya Demokratîk em ê Bakur û Rojhilatê Sûriyeyê biparêzin û azadiya fîzîkî ya Rêber Abdullah Ocalan misoger bikin’ Yekemîn Festîvala Çandî û Hunerî ya Herêma Cizîrê li navçeya Til Birakê ya girêdayê bajarê Hesekê hat li darxistin û 2 rojan domand. Bi sedan ji pêkhateyên kantona Qamişlo û Hesekê bi cil û bergên xwe yên gelêrî beşdarî festîvalê bûn. Festîval li ser girê dîrokî yê li navçeya Til Birakê hat lidarxistin. Her wiha 4 konên ku di bin her yekî de çanda pêkhateyekê; Kurd, Ereb, Suryan û Ermen hatine pêşkêşkirin, hatin vedan.
Çalakiyên roja yekemîn
Di roja yekem ya festîvalê de çalakî ji aliyê Koma Tolhidan a muzîkê, Koma Şehîd Sosin a Kovendê, Koma Ertisax a Govanda Ermenî, Koma Şehîd Dîlan a Govendê û Koma Înana ya Filiklor a komeleya çandê ya Suriyaniyan hatin li dar xistin.
Her wiha Helbestvan Ferhad Merdê û helbestvan Hemîd Telfah Elamûdî helbest gotin, herwiha Koma Cizîrê şanoyek pêşkêş kirin.
Tevlîbûna pêşengihên kevneşopî ya pêkhateyan
Di dewama çalakiyên festîvalê de, Pêşengiha Kevne Torî, pêşengiha stranên dengbêjî, pêşengiha pirtûkên dîrokî û çandî, her wiha nîşandana karê destan, nîşandana hesp û diveyan, nîşandana tabloyên hunerî, nîşandana xwarinên û cil û bergên gelêrî hatin pêşkêşkirin. Çalakiyên festîvalê yên roja yekemîn bi stranên folklorî ji hêla hunermend Peyman û Keder ve û dîlanên ji hêla pêkhateyên herêmê ve bi dawî bûn.
Çalakiyên Roja duyemîn
Di roja duyemîn ya festîvalê de wê Koma Cûdî ya Mûzîkê, Koma Govendên Aşûriyan, Koma Govendê ya Komîna Cizîrê, Koma Esayil ya Tepqa, Koma Sayat Nova ya mûzîka Ermeniyan, Koma Şano ya Şehîd Darsîn, Koma Govendê ya Şehîd Çekdar Ereb û Elefteriya ya mûzîkê, çalakiyên muzîkê pêşkêş bikin. Her wiha hunermend Teleb û Tarîq, hunermend Caziya Gênco, hunermed Baran Dilbihar û Maksîmos Ishaq stranên xwe yên gelêrî pêşkêş bikin. Di dawiya festîvalê de wê xelat li ser komên ku tevlî festîvalê bûne bê belavkirin.
