Hemza Sêvo/ Qamişlo
Di şexsê welatparêz Yûsif Gulo de Romana “Qelen” a nivîskar Ebûd Mexso piştî du salan ji kar û xebatê ji aliyê Dîwana wêjeyê ve li Baxçeyê Xwendinê ya bajarê Qamişlo bi çalakiyekê hate îmzekirin.
Dîwana Wêjeyê li bakur û rojhilatê Sûriyê romana bi serenavê Qelen bi amadebûna malbata Gulo, nivîskar, rewşenbîr, helbestvan, nûnerên Tevgera Civaka Demokratîk (TEV-DEM), Rêveberiya Xweser a Herêma Cizîrê û şêniyên bajarê Qamişlo bi çalakiyeke wêjeyî îmze kir.
Qelen weke yekem romana nivîskarê kurd Ebûd Mexso ye, ji aliyê weşana Dîwana Wêjeyê ya bakur û rojhilatê Sûriyê, li çapxaniya Herekol bi 152 rûpelî ev pirtûk hatiye çapkirin û naveroka vê romanê li ser welatparêziya Yûsif Gulo ye.
Herwiha Yûsif Gulo di 9`ê Mijdara 2021`an de tevî 2 neviyên xwe di encama êrişa dewleta Tirk a dagirker de li taxa Hilêliyê ya Qamişlo şehîd ketibû. Lewma di şexsê wî de nivîskar Mexso piştî xebata 2 salan xwest di salvegera şehadeta Apê Yûsif de pirtûka xwe ya giran buha bide îmzekirin.
Destpêkê hemû kesên beşdar xuleyeke bêdengiyê li ser giyanê şehîdan rawestiyan û piştre birayê şehîd Yûsif Gulo, Ibrahîm Gulo wiha axivî: “Yûsifê Gulo timî ji bo gelê kurd û azadiya welatê xwe karê netewperwerî dikir. Ev yek jî xwesteka wî bû ku can, mal û milkê xwe bi giştî bixe xizmeta civak û azadiya welat de, ez di wê baweriyê de me ku xwesteka we jî weke ya apê we Yûsif e. Em şehadeta wî di vê roja pîroz de bibîr tînin em bi we şanaz û serbilind in.
Piştre jî bi navê Dîwana Wêjeyê ya bakur û rojhilatê Sûriyê, Diyar Buhtî wiha anî ser ziman: ” Malbata Gulo û apê Yûsif rûmeta gelê kurd in, em jî bi serbilindî 2’yemîn salvegera wî bibîrtînin. Nivîskar Ebûd Mexso kedeke mezin ji bo nivîsîna vê romanê daye, bi taybetî ku li ser kesayetekî wiha nivîsiye. Ez keda nivîskar Mexso pir pîroz dibînim û we tewsiyet dikim ku hûn bixwînin. ”
Di heman çarçoveyê de li ser navê Dîwana Wêjeyî Narîman Ebdikê jî wiha got:” Romana nivîskar Mexso giranbuha ye ji ber 3 sedeman û hêjayî xwendinê ye. Yek ji girîngtirîn sedeman ew e ku li ser pêşengê şoreşa Rojava ye, dema ku em bibêjin şoreşa Rojava wê demê em behsa xebata apê Yûsif dikin. Sedema din ew e ku li ser bîranîn û têkoşîna şehadeta Apê Yûsif e û sedema 3’yan jî ji ber ku bi zimanê Kurdî hatiye nivîsîn.”
Piştre jî nivîskarê romana Qelen, Ebûd Mexso wiha destnîşan kir: “Min piştî ked û hêsirên çavan ev berhem bi dawî kir. Wekî hûn dizanin ez helbestvan im û gelek hebestên min jî hene û hatine çapkirin. Ez ji salên 80 ve Apê Yûsif û malbata Gulo, herwiha têkoşîn û welatparêziya wan nas dikim. Armanca min ji nivîsandina vê romanê jî wesfkirina vî kesayetî, xebata wî û malbata Gulo bû destnîşankirina hovîtiya dagirkeriya Tirkiyê ku çawa pêşengan hedef digre.”
Herî dawî jî 500 roman ji aliyê endamên Dîwana Wêjeyê ve hatin îmzekirin û li hemû kesên amade hatin belavkirin.