Bi durşmeya ‘sala Cizîrî) heftemîn Fastîvala Osman Sebrî ya wêjeyî bi amadebûna nivîskar, rewşenbîr, helbestvan, nûnerên Rêveberiya Xweser û Tevgera Civaka Demokratîk (TEV-DEM) li ser asta Rojava û Sûriyê li bajarê Qamişlo hat destpêkirin û wê 3 rojan bidome.
Desteya Çandê ya Herêma Cizîrê û bi hevkariya Dîwana Wêjeyê ya Bakur û Rojhilatê Sûriyê heftemîn fastîvala Osman Sebrî ya wêjeyî bi armanca pêşxistin û parasrina wêjeya hemû pêkhateyên Rojava û Sûriyê dest bi Fastîvala Osman Sebrî a 7’an li hola Zanîngeha Rojava ya bajarê Qamişlo destpêkir. Fastîvala îsal bi taybet girêdayî helbestê ye û wê di nava festîvalê de pêşbirk jî hebin. Ji ber vê yekê jî ji destpêka sala 2023’an ve hejmareke mezin a helbestên helbestvanan li ser asta Bakur û Rojhilatê Sûriyê, Rojava, Kurdistan û yên derveyî welat hatin wergiritin û hatin xwendin û nirxandin.
Di destpêka festîvalê de hemû kesên beşdar xuleyeke bêdeng li ser giyanê şehîdên pakrewan rawestiyan û piştre li ser navê Rêveberiya Xweser Rêvebera Desteya Çandê ya Herêma Cizîrê Mariya Aho di derbarê fastîvalê de axivî û weha got: “Fastîvala Osman Sebrî ya wêjeyê Îro tê destpêkirin, ev fastîvala 7’emîn bi domdariya 7 salan îsal jî tekez bû ku ber bi serkeftin, pêşxistin û berdewambûnê ve diçe. Hêjayî gotinê ye ku 
ev fastîval xwedî karîn û şiyan bû ku hejmareke baş ji rewşenbîr û wêjevanan ji tevahiya Bakur û Rojhilatê Sûriyê kom bike. Ev jî bi saya kesên ku bi fastîvala Osman Sebrî rabûne pêk tê û keda wan a ji bo pêşxistin û parstina wêjeya civakê ye.”
Têkildarî heman mijarê endamê Komîteya Amadekar a Fastîvala Osman Sebrî, Silêman Mehmûd wiha axivî: “Ji destpêka sala 2023`yan ve amadekariyên fastîvala Osman Sebrî tên kirin, lê ji ber êrişên dewleta Tirk a dagirker carekê hat taloqkirin. Di roja yekem a Fastîvala Osman Sebrî de ku kete heman roja piştgiriya cîhanî ya Kobanê, em gelê Kobanê silav dikin û hêviyên me hene ku hemû deverên hatine dagirkirin werin rizgarkirin û azadiya fîzîkî ji bo Rêber Apo wê armancê me yê sereke be. Armanca vê fastîvalê ya sereke pêşxistin û parastina wêjeya hemû pêkhateyan e. Di heman demê de jî avakrina pêşbirkekê di nav wêjevan û helbesvanan de ye. Herwiha îsal me ev fastîval bi sala Melayê Cizîrî destnîşan kir, sedem ji vê yekê derwandina dagirkeriya Tirk e ya ku dibêje Melayê Cizîrî ne kurd e û rastiyan berevajî dike. ”
Piştre jî senefizyonek li ser jiyana siyasetmedar, helbestvan û nivîskarê Kurd Osman Sebrî hat pêşandan û herwiha ji koma Pargîn çend stranên dengbêjiyê yên gelêrî ji çand û filklora herêma koçeran a girêdayê Dêrkê hatin gotin. Piştre jî helbestvan Kurdiyar Dirêî û Dilyar Osê helbestên xwe yê bi zimanê Kurdî xwendin. Piştre helbestvan Samir Elşumerî û Mistefa Elhac jî çend helbestên xwe yên bi zimanê erebî ji beşdaran re xwendin.
Di dawiya fastîvalê de 4 pirtûkên di fastîvala 6’an a Osman Sebrî de ku di encama pêşbirka romanê de nivîskarên romanan hatibûn xelatkirin, berhemên wan îsal di roja yekem a fastîvala 7’an de ji aliyê Desteya
Çandê ya herêma Cizîrê û Dîwana Wêjeyê ya Bakur û Rojhilatê Sûriyê ve hatin îmzekirin. Herwiha ji wan pirtûkan 3 bi zimanê erebî bûn û ya din bi kurdî bû.
Hêjayî bi bîrxistinê ye ku roja duyem ji Fastîvala Osman Sebrî bi naveroka xwe ve wê li ser gengeşe û nîqaşên derbarê felsefeya Melayê Cizîrî de be. Di heman demê de jî wê kurteçîrokên hin nivîskaran bi zimanê kurdî û erebî jî werin xwendin.
Roja 3’yan û ya dawî wê muzîk û sitran jî werin gotin. Herwiha senefizyonek li ser komîteya Nirxandinê were pêşkêşkirin û encamên pêşbirka helbestê ya îsal wê were ragihandin û asta 1,2 û 3’an wê werin xelatkirin.