Nehîr Pale
Dîroka jin a berevajî hatiye nivîsandin dibe êdî li gorî heqîqeta wê ji nûve were belge kirin. Dilxwazên azadî û wekheviyê, lêgervanên heqîqetê her hene û wê hebin.
Dewleta Îranê di êrîşên xwe yên li ser jin û serhildanên gel ji dewletên dîtir ne cûda ye. Çawa cendermeyên Tirk bi destdirêjiyê jinên Dêrsimê kuştin niha li Îranê heman rêbazî li dijî jin û ciwanan didin meşandin. Dixwazin wan bidin tirsandin, wan terbiye bikin, fêrî koletiyê bikin û her serê wan tewandî be.
Gelo dewleta Îranê û hemû dewletên koletiyê li ser gelan ferz dikin wê heyanî kengî bi kuştin, darvekirin, girtin û tecawizkirinê çavên gelan bitirsînin.
Serhildanên bi dirûşmeya Jin, Jiyan, Azadî li Rojhilatê Kurdistanê û Îranê di 16`ê Îlonê 2022`an dest pê kirin û her diçe kûrtir dibe û bû malê cîhanê tevahî.
Jîna Emînî li beramberî polîsên exlaqî û sîstemên ku jinê di bin navê zagon û exlaq de difetisînin dengê xwe bilind kir û niha jî bi sedan jin rêça wê dişopîn in. Jin tu carî li beramberî sîstemên zalim serê xwe netewandiye, çiqasî êrîş dikin ku daxwaza jin a guhertinê, jiyaneke azad û wekhev biperçiqînin lê nikarîbûn. Jin parçeyek ji xwezayê ye û çawa xweza her tim xwebûna xwe diparêze, jin jî têkoşîna hebûnê dike. Sîstemên dagirker her tim li hemberî dilxwazên azadiyê û lêgervanên heqîqetê rêbazên herî qirêj didin bi kar anîn. Dîroka jin ku ji nûve tê nivîsandin şahidiya vê yekê dike.
Jin li hemberî kuştina Jîna Emînî bêdeng neman û helwestê xwe diyar kirin. Sîstemê Jîna Emînî qetilkir, jinan jî ew desmala ku kirine star û namûsa jinê ji serê xwe avêtin, şewitandin û pêlê kirin. Di serhildanan de bi dirûşmeya Jin, Jiyan, Azadî daxwaza azadiya xwe kirin, hemû bûn Jîna Emînî û daketin kolanan. Ji roja 16`ê Îlonê heyanî niha dewleta Îranê li hemberî van serhildanan di nava dek û dolaban de ye. Tenê roja salvegera şehadeta Jîna Emînî 700 kes bin çav kirin. Li gorî agahiyên Rêxistina Mafên Mirovan a Îranê dewleta Îranê 7 xwepêşandan bidarve kirin û hukmê darvekirine daye 10 kesan û niha jî 82 kes dibe ku hukmê darvekirinê li wan were birîn. Rojane jî jinên siyasetmedar, rojnamevan û serhildêr digrin, herwiha ji bo şagirtên jin bê bandor bikin li dibistanan bi sedan kes bi jehrî xistin û niha her tim balafirên şer li ser bajarên ku serhildan lê hene, digerin.
Jin li Rojhilatê Kurdistanê û Îranê gav paşve ne avêtiye, sîstema Îranê hemû rêbazên qirêj ji bo tefandina van serhildanan dan bi kar anîn lê nikarin şoreşa jinê bi dawî bikin. Roja 16`ê Îlona 2023`an gel li gelek bajarên Rojhilatê Kurdistanê û Îranê dest bi giravê kirin. Li girtîgeha Evîn a Îranê 7 girtiyên jin ên siyasî ji bo piştgiriya serhildanên Rojhilatê Kurdistanê û Îranê çalakî kirin û di daxuyaniya xwe de daxwaz ji raya giştî û gelên demokratîk kirin ku bibin dengê gelê Îranê û xwepêşanderan. Li Kurdistanê û Ewrûpa meş û mitîng hatin organîzekirin û li dewletên herêmî jî Tevgerên Jinan bi riya daxuyanî û nameyan desteka xwe ji serhildanên Rojhilatê Kurdistanê û Îranê re raber kirin û silav kirin. Helwest dayîn hebûna gelan diyar dike û diparêz e.