Ayşa Silêman/Qamişlo
Mamosteyên Bexçeyên Zarokan yên herêma Cizîrê salane tevlî perwerdeyên biranşan dibin, îsal jî perwede bi vekirina sê navendan destpê kir û 176 mamoste tevlî perwerdeyê bûn.
Ji destpêka avakirina Bexceyên Zarokan yên girêdayê Desteya Perwerde û Fêrkirinê ya herêma Cizîrê, ji bo pêşxistina asta mamosteyan ya zanistî û rêbazên wanedayîne, salane beriya vekirina bexçeyên zarokan mamoste tevlî perwerdeyan dibin.
Îsal ji bi heman armancê, mamosteyên herêma cezîrê ji bo tevlîbûna perwerdeyê li sê navendan hatin belavkirin.
Derbarê perwerdeya mamosteyên bexçeyên zarokan, Rêvebera Bexçeyên Zarokan a Herêma Cizîrê Semîra Hacî ji rojnameya me re axivî.
Semîra Hacî diyar kir ku ji sala 2015′ an ve ew beriya destpêkirina werzê xwendinê, perwerdeya biranşan didin mamosteyan û wiha got: “Ji bo perwerdeya mamosteyan, îsal jî me sê navend vekirin; li Girkêlegê, Hesekê û Qamişlo, mamosteyên Amûdê û Tirbespîyê jî tevlî navenda Qamişlo bûn, li navenda Qamişlo mamoste li ser du beşan hatin belavkirin û her beşek şeş roj dewam dike. Beşa yekê ji 19’ê Tebaxê destpê kir û 24 Tebaxê de bidawî bû, hijmara mamosteyên beşdar bûyîn 86 mamoste bûn, herwiha beşa duyem jî ji 26’ê Tebaxê destpêkir û 31’ê Tebaxê bidawî bû, di vê beşê de jî 90 mamoste beşdar bûn.”
Semîra Hacî da zanîn ku armanca wan ji perwerdeyan pêşxistina asta mamosteyan e û wiha pê da çû: “Ji ber ku ne her kes li bexçeyan kar dikin akademî bû, ji ber vê yekê me perwerdeya biranşan dan, da ku mamosteyan fêr bikin ji aliyê danûstandinê, têkiliyên wan bi zarokan re û da ku bikaribin vê zarokê fêrî jiyan, tîp ,hijmaran jî bikin, em bi hemû hewildanên xwe wan fêrî çand, exlaq û dîrok dikin û bikaribin bingehê wan avabikin û mamosteyan fêrî danûstandinê wan bi malbatan re jî dikin, herwiha me semîner li ser nexweşiyên zarokan dan, weke nexweşiya tenêbûn, tirs, bihintengbûn û yên ser hişk, her pirsgirêkek û çareseriya wê didin.”
Tekezkirin li ser perwedeya rast
Semêra Hacî daxuyakirin ku di perwerdeyê de ne tenê mamoste tevlî dibin, alîkar jî hene ew jî van semîneran dibin û ev kesên alîkar dikevin şûna mamosteyan gava mamoste bihinvedanê distînin, lewma divabe ew jî şêwazê danûdstandinên bi zarokan re bizanibin û wiha dawî li axaftina xwe anî û got:” Asta mamosteyan bi giştî başin û serkeftî ne ji ber ku piraniya wan bawernameyên zanîngehan bi wan re heye wek; bawernameya derûnasî, civaknasî, mamosteyên refê. Daxwaza min hertim mamoste lêkolîna bikin û ev lêkolîn jî bisûd bin da ku di perwerdeyê de bikar bînin û ez dikarim tekez bikim heger her kes û her mamosteyek guh bide xwendekarên xwe wê xwendekarên serkeftî derkevin ne kêmî zarokên Ewropiyan. Perwerde bingeha pêşxistina mamosteya ne.”
‘Perwede geşkirina rihê hevaltiyê ye jî’
Têkildarî heman mijarê mamosteya bi navê Lorîn Ehmo da xuyanîkirin ku ew rojane ji bajarê Tirbespiyê ji bo perwerdeyê tên û wiha got: “Ji me tê xwestin em destpêkê zimanê dayîkê zanibin, çawa derbasî bexçê zarokan bibin û bi çi awayî zaroka bi rêve bibin him ji aliyê paqijî, rêzgirtin, çalakî, wane û wêneyan de. Ez heyanî niha tevlî çar perwerdeyan bûme . Kumisyonên me bi şêwazekî gelek xweş didin û rihê hevaltiyê û dil nizimbûn li cem wan heye, derfetê didin mamosteyan ku bi axivin nêrîn , astengî û pêşniyarên xwe bêjin.”
Astengiyên ku dikevin riya mamosteyan
Mamoste Lorîn Ehmo dawî li axaftina xwe anî û wiha got: “Em gelek zehmetiyan bi zarokan re dibînin ji ber ku di vî temenî de ev cara yekem zarok ji dayîka xwe qut dibe, em hewl didin bibin dayîk ji vî zarokî re û alîkariya wî bikin nêzîkatiyê xwe pêre çêkin ji ber ku zarokin hene ezezîtî bi wan re ye naxwazin kes nêzî wan û tiştên wan bibin, em dibin alîkar pê re ku hêdî hêdî ji vê yekê derbas bibe. Daxwaza min ku em baştir li ser bexçeyê zarokan bisekinin û heger derfet hebe em van bexçan ji aliyê cih,astê ve pêşbixin û ji malbatên van zarokan jî dixwazin ku ew bi me re alîkar bin.”
