“Xewna min a ku te nehişt ez bi dest bixim, tevgera azadiya Kurdistanê ji min re pêk anî” jineke Kurd a 60 salî bi van gotinan, bavê xwe muxteb girt. Jina 60 salî kevneşopiyên civakî qetandin û xewna xwe ya fêrbûna bi zimanê zikmakî pêk anî.
Emîra Ebdo, ji ber kevneşopiyên berê neçû dibistanê û ji fêrbûnê bê par ma. Bav û birayê wê bi hinceta wan urf û adetan ku nabe zarokên keçîn biçin dibistanê, nehiştin ku Emîra di 6 saliya xwe de biçe dibistanê.
Hesreta xwendinê sal bi sal li ba Emîra zêdetir dibû, ku ew niha dayika 3 keç û 4 xortan e. Emîra behsa serpêhatiya xwe ya wê demê kir û got: “Daxwaza min a fêrbûn û xwendinê mezin bû. Lê belê bav û birayê min bi bihaneya adet û kevneşopiyan nehitşin ez vê daxwaza xwe pêk bînim. Ev adet li ser jinan û civakê serwer bû. Di encamê de ez bûm jineke nexwende.”
Emîra heta salên 90`î yên sedsala borî bê xwendin ma. Lê dema serdana cîraneke xwe dike, li wir tevgera azadiya Kurdistanê nas dike. Pê re rêwîtiya fêrbûnê lê vê carê bi zimanê Kurdî dest pê dike.
Dema Emîra 30 salî bû xewna wê pêk hat. Tevî 9 jinên din alfabeya kurdî fêr dibe. Têkildarî wê got: “Em pêşî fêrî tîpan bûn. Hêza fêrbûnê li ba me mezin bû, me her tişt li paş xwe hişt û me xwe ji fêrbûnê re vala kir.”
Ji bo ku tiştê ku fêr bûye ji bîr neke, Emîra dîwana helbestvanê mezin Cegerxwîn peyda kir. Emîra piştrast kir ku wê dersên zimanê Kurdî dan 30 zarokan, 4 ji wan niha şervanên tevgera azadiya Kurdistanê ne.
Piştî Şoreşa 19’ê Tîrmeha 2012’an a Rojavayê Kurdistanê û Bakur û Rojhilatê Sûriyeyê, Emîra Ebdo di komîteyeke lihevanînê ya Kongra Star a Qamişlo de cih girt. Her wiha ew, neviyên xwe fêrî zimanê Kurdî dike. Di derbarê vê yekê de got: “Ziman jî yek ji hêmanên sereke yên çand û dîroka civakan e.”
Emîra bang li jinên ku nizanin bixwînin û binivîsin kir ku bi zimanê xwe yê zikmakî fêr bibin û wiha domand: “Bila temen li pêşiya pêkanîna armancên wan nebe astengî. Bila hemû jin zimanê xwe yê zikmakî fêr bibin û keç û xortên xwe fêr bikin. Ji ber ku civak bi zanist û xwendinê bi pêş dikevin.”
Emîra 2 caran serkeftin bi dest xist, cara yekê dema kevneşopî têk bibin û cara din dema xewna xwe ya fêrbûna, xwendin û nivisînê bi dest xist. Emîra gotina ku rojekê ji bavê xwe re gotibû bi bîr anî û got: “Xewna min a ku te nehişt ez bi dest bixim, Tevgera Azadiya Kurdistanê ji min re pêk anî. Çavên me ronî kirin, em zana û rizgar kirin. Bendên ku jin bindest kirin, şikandin.”