Stêrk Mihemed/Qamişlo
Bi dirûşmeya “Rojeke bi jiyana azad re diyalok” Kongra Star ji bo azadiya fîzîkî ya Rêber Apo meşeke xweser li ser asta kantona Qamişlo lidardixistin.
Îro bi pêşengtiya Kongre Star meşeke xweser ji bo azadiya fîzîkî ya Rêber Apo bi dirûşmeya “Rojek bi jiyana azad re diyalok” hat lidarxistin.
Bi beşdarbûna bi sedan jin,meşê ji çarxereya Sonî dest pê kir û heya navenda Mihemed Şêxo ya bajarê Qamişlo bi dawî bû.
Di meşê de wêneyê Rêberê Gelan Abdullah Ocalan hatin bilindkirin û siloganên ji bo Rêber Apo azadî hatin qîrîn. Meş li pêşiya navenda Mihemed Şêxo ya Çand û Hunerê veguherî mîtîngê, piştî wê deqeyeke rêzgirtin li ser giyana Şehîdan hat rawestandin.
Piştî wê li ser navê Kongre Star Bêrîvan Xalid axivî û wiha got: “Îro dîsa jina azad hevaltiya xwe bi Rêber Apo re da
diyarkirin. Bi salan e Rêber Apo di bin siyaseta tecrîd û qirkirinê de ye, bi komployeke reş û tarî bi destê dewleta Tirk a dagirker û dewletên navnetewî xwestin Rêberê Gelê Kurd têxin nav çar dîwaran, xwestin Rêberê mirovhiyê ji gelê wî qut bikin, lê tersî wê Rêber Apo ew çar dîwar kir dibistan bi fikir û ramanê xwe, felsefeyek di wê zindanê de afirand, ev felsefeya ku îro jinên Kurdistanî bi gîştî xwe li ser ava dikin, ev felsefeya “Jin Jiyan Azadî ” ye, di heman demê de felsefeya netewa demokratîk ya ku jin pêşengtiya wî dike Rêber Apo ev felsefe ji me re pêşkêş kir. Netewa Demokratîk ya ku hemû gelan di nava xwe de hembêz dike. Piştî hilweşandina rêjîma Baas hemû gel li bendê bûn ku bi hev re jiyan bikin, lê îro em rojane qetilkirina Elewiyan û Dirziyan dibînin. Îro ev roja ku em jiyan dikin bi saya felsefeya Rêber Apo ye, jina azad pêşêngtiya vê şoreşê dike, bi saya vê felsefeyê em hemû bi hev re jiyan dikin.”
Meş bi silogana “Bê serok jiyan nabe ” bi dawî bû.
