Hevserokatiya Konseya Rêveber a KCK’ê salvegera 19’ê Tîrmehê Şoreşa Rojava pîroz kir. KCK’ê di peyama xwe de got, “Ji ber mezinbûna şoreşê dijmin êrîşkar bûye.”
Têkildarî salvegera 6’emîn a Şoreşa Rojava Hevserokiya Konseya Rêveber a KCK’ê daxuyaniyeke nivîskî weşand. KCK’ê diyar kir ku li Rojava hemû gel bi azadî bi hev re dijîn.
Di daxuyaniya KCK’ê de ev tişt hate diyarkirin:
“Di 19’ê Tîrmeha 2012’an de ji bo gelên Kurdistan, Sûriye û Rojhilata Navîn serdemeke nû bi Şoreşa Rojava re hatiye destpêkirin.
Rastiya gel û civakî ya ku Rêber Apo di 20 salan de ava kiriye, di havîna 2012’an de bûye şoreşa civakî. Şoreşa Rojava bi xeta xweseriya demokratîk û konfederalîzmê bûye modela azadî û demokrasiyê. Kantonên li Rojava û Federasyona Bakurê Sûriyê li dijî her cure êrîşan bi qehremanî li ber xwe daye.Bi bêrdêlên giran bûye garantiya jiyana azad û demokratîk a gelên Sûriyê.
Xeta azadiya jinê ya ya di Şoreşa Rojava de hemû cîhan xistiye nav heyecanê. Ji ber vê jî gelên cîhanê Şoreşa Rojava wekî şoreşa jinê pênase dikin. Bi Şoreşa Rojava re hatiye dîtin ku demokrasiya rastîn ew ê bi nirxên civakî yên Rojhilata Navîn pêk were. Ji niha û şûnde têkoşerên azadî û demokrasiyê yên li Rojhilata Navîn û cîhanê ew ê Şoreşa Rojava ji xwe re bikin mînak. Ev tişt gelekî zelal e ku, ji ber mezinbûna şoreşê dijmin êrîşkar bûye. Tê dîtin ku bi kûrbûna azadî û demokrasiyê re, divê berxwedan jî kûr û berfireh be. Şoreşa Rojava xwe her dem spartiye gel û hêza xwe ya navxweyî, ji niha şûnde jî wisa bidome ew ê şoreş bêtir serkeftî be.”
Ji ber mezinbûna şoreşê dijmin êrişkar buye
