Li Rojava jin di her qadên jiyanê de bi keda xwe berheman pêk tînin.
Jinên Dêrikê beşdarî hemû xebatan dibin û projeyên aboriya jinan ava dikin. Jina bi navê Nayla Hesen ku di firina jinan a li Dêrikê de dixebite derbarê projeyên aboriya jinan de axivî û got, “Ji bo pêşxistina aboriya xweser ya jinan pêşxistina projeyan girîng in.”
JIN BEŞDARÎ HEMÛ QADÊN JIYANÊ DIBIN
Yek ji berhemên projeya xweser ya aboriya jinan jî Firina Adar e. Jin di vê firinê de dixebitin û bi rêve dibin. Yek ji xebatkara firinê Nayla Hesen diyar kir ku Firina Adar ev du sale hatiye vekirin û wiha got, “Vekirina firina Adar ber bi pêşxistina aboriya xweser de gaveke girîng bû.” Nayla da zanîn ku ew rojane ji sibê heta saetên piştî nîvro firinê dixebitînin.
Nayla wiha dewam kir, “Em weke rojane bi saetan li ser piyan dimînin. Ev xebateke zehmete lê em bi ked û xwîdana xwe kêfxweşin. Ji ber ku em bi keda didin hem xizmetê ji gel re dikin û hem jî debara mala xwe dikin.”
Nayla Hesen di dawiyê de da zanîn ku armanca ji van projeyan ew e ku ji bo jinan derfetên xebatê were ava kirin û got, “Divê jin bi malê sînordar nemînin û beşdarî hemû xebatên civakê bibin. Di pêşxistina aboriyê de jî divê xwedî rol bin.”
Gulbîn BOZO
