Meclîsa Jinan dewreya 4`emîn bi dawî kir

Akademiya Meclisa Jinên Sûriyê bi dirûşma “Jin bingeha avakirina civakê ne” dewreya perwerdeyê ya 4`emîn bi merasîmekê bi dawî kir.
Akademiya Meclisa Jinên Sûriyê bi dirûşma “Jin bingeha avakirina civakê ne” dewreya perwerdeyê ya 4`emîn li gundê Tişrîn ê Reqayê bi tevlêbûna 25 endamên saziyên sivîl, leşkerî, endamên Meclisa Herêma Cizîrê û Reqayê bi dawî kir. Dewreya perwerdeyê 25 rojan dewam kir. Di dewreyê de li ser mijarên cihêreng ders hatin dayîn.
Endamên Komîteya Jinên Sûriyê ya Reqayê, ciwanên Reqa û endamên Saziya Malbatên Şehîdan beşdarî merasîma bidawîkirina dewreyê bûn.
Yek ji rêveberên akademiyê Wefa El-Xelef di merasîmê de axivî û diyar kir jinên ku tev li dewreyê bûne gelek sûd ji perwerdeyê wergirtin û ev yek jî hêza wan li hemberî fikrên desthilatdar xurt dike.
Paşê ji rêvebera Komîteya Jinên Reqa û gundewarên wê Zelîxa Ebdê bidawîkirina dewreyê li hemû jinan pîroz kir û diyar kir ku armanca wan asta zanebûna jinê bilind bibe û jin xwe ji zilm û zora ku berê li ser wê dihat meşandin rizgar bike.
Zelîxa da zanîn ku jina perwerde kirî asta wê ya zanebûnê û rêxistinkirên zêdetir e û got, “jin bi rêya perwerdeyan dikare asta zanebûna xwe bilind bike.”