Welatiyên Efrînê yên li ku ji ber êrîşên dagirkeriya Tirk li Şehbayê bi cih bûne di nava şert û mercên zehmet de dijîn û têkoşîna xwe berdewam dikin. Ji ber kêmbûna dermanan û xizmeta tendurustiyê bi nexweşiyan re rû bi rû dimînin. Rêveberên nexweşxaneya Avrîn ji bo alîkariyê bang li rêxistinên mirovî kirin.
Ji ber kêmbûna derman û alavên tendrûstiyê yên pêwîst, hejmara mirin û nexweşan li nav welatiyên Efrînê yên li Şehbayê de zêde dibin. Rêveberên nexweşxaneya Avrîn bang li rêxistin û aliyên têkildar kirin ku ji bo rêgirtina li ber mirinan, alav û pêdiviyên pêwîst ji wan re peyda bikin.
Komîteyên tendrûstiyê yên girêdayî Heyva Sor a Kurd li Şehbayê bi derfetên kêm ji bo şêniyên Efrînê bi erkên xwe radibin. Nexweşxaneya Avrîn û gelek navendên tendrûstiyê li herêmê û navçeyên Şehbayê vekirin.
Ji ber dorpêçkirina Şehbayê, komîteyên tendrûstiyê nikarin derman û pêwîstiyên tendurustî ji bo dermankirina nexweşan derbasî kantonê bikin û nikarin nexweşan jî derxînin derveyî herêmê. Bi vê yekê metirsiyên zêdebûna mirinan zêde dibe.
Endamê Rêveber a nexweşxaneya Avrîn a navçeya Fafînê Mihemed Şêxo, diyar kir ku ji ber dagikirina Efrînê ji aliyê artêşa Tirk a dagirker û komkujiyên ku li Efrînê li dijî sivîlan pêk anî, şêniyên Efrînê neçar man ji malên xwe derkevin û li kantona Şehbayê bi cih bibin.
Şêxo destnîşan kir ku ji ber dorpêçkirina Şehbayê gelek astengiyan dikşînin û hin nexweşiyan ji ber kêm derfetan û kêmbûna dermanan, nikarin derman bikin, lewra gelek nexweş jiyana xwe ji dest didin.
Şêxo wiha dewam kir,”Pêwîstiya gelek nexweşan bi derketina derveyî Şehbayê heye. Pêwîstiya 30 nexweşên penceşêrê bi dermankirina lezgîn hene, 450 nexweş li hêviya erêkirina derkertina derveyî herêmê ne.”
Şêxo di dawiyê de bang li rêxistinên mafên mirovan kir ku serdana Şehbayê bikin, rewşa zehmet a şêniyên Efrînê bi çavên xwe bibînin û alîkariya wan bikin ji bo ku rê li ber mirinan were girtin…ANHA
