Endamê Konseya Rêveber a KCK’ê Mûstafa Karasû derbarê tecrîda giran a li ser Rêberê Gelê Kurd Abdullah Ocalan de axivî û diyar kir ku rêberê Gelê Kurd Abdullah Ocalan bi avakirina PKK’ê re planên qirkirinê, planên tinekirina Kurdan ên dewleta Tirk ji hev xist. Ji ber vê yekê tolê ji Rêber Apo hiltînin.”
Karasû diyar kir ku rêberê Gelê Kurd Abdullah Ocalan bi avakirina PKK’ê re planên qirkirinê, planên tinekirina Kurdan ên dewleta Tirk ji hev xist.
Endamê Konseya Rêveber a KCK’ê Mûstafa Karasû derbarê tecrîda giran a li ser Rêberê Gelê Kurd Abdullah Ocalan bersiv da pirsên rojnameya Yenî Ozgur Polîtîkayê.
Karasû diyar kir ku Rêberê Gelê Kurd Abdullah Ocalan rêberekî ji rêzê yê siyasî nîne û got, “Rêber Apo ne tenê bernameyeke siyasî danî holê û qala azadiya Kurd û Kurdistanê kir. PKK jî ne tevgereke wiha ye. Rêber Apo zîhniyet, nêrîn, hestên Kurdan guherand; jiyan, rewşa malbatî û têkiliyên wan ên cîrantiyê guherand. Civakeke ku karibe têbikoşe derxist holê. Ji bo karibe di oxira azadî û demokrasiyê de têbikoşe, jiyana wan bi temamî guherand. Li dijî her şêweyên paşverûtiyê têkoşiya û gelê Kurd rakir ser piyan.”
Karasû destnîşan kir ku bi têkoşîna Ocalan re rastiya Kurdên Azad afirî û wiha axivî: “Rastiya Kurdên Azad ên navenda xwe Amed e derkete holê. Rêber Apo got, “Rastiya Kurd a ku min afirand, rastiya Kurdên Azad ên navenda xwe Amed e”. Ev bîst sal in ji ber vê yekê tecrîdeke giran li ser wî tê ferzkirin. Naxwazin gotineke wî jî bigihêje derve. Dibînin ku gotineke wî jî dikare bandorê li civakê bike. Lewma tecrîd û zexteke gelekî giran li ser wî heye.”
RÊBER APO PLANÊN QIRKIRINÊ JI HEV XIST
Karasû diyar kir, Ocalan rêberê gel e, rêberê şoreşê ye û bi hest û nêrînên xwe civakê bi rê ve dibe. Mûstafa Karasû anî ziman ku ji ber van taybetmendiyên xwe, dijminatiyeke mezin li Rêberê Gelê Kurd Abdullah Ocalan tê kirin û wiha dewam kir: “Rêber Apo derkete holê, koma Apoyî ava kir, PKK damezrand û bi têkoşîneke mezin planên qirkirinê, planên tinekirina Kurdan ên dewleta Tirk ji hev xist, ji holê rakir. Lewma dijminatiyeke mezin li Rêbertî dikin. Ji ber ku mejî, polîtîka û têkoşîna vî Rêbertî bandor li Kurdên li hemû parçeyan kir. Rastiya dewleta Tirk, rastiya civaka Tirkiyeyê li pişt rastiya civakî û siyasî ya gelê Kurd maye. Ji ber vê yekê jî li dijî Rêber Apo bi hêrs in. Tolê ji Rêber Apo hiltînin.”
KIRYARÊN TAYBET ÊN LI DIJÎ ŞEXSEKÎ
Endamê Konseya Rêveber a KCK’ê Mûstafa Karasû diyar kir ku dewleta Tirk hemû derfetên xwe ji bo tinekirina têkoşîna 35 salan a bi pêşengiya PKK’ê bi kar tîne û got: “Hemû polîtîkayên xwe di vê çarçoveyê de ne. Dewleta ku li dijî têkoşîna azadiyê ya gelê Kurd, li dijî têkoşîna azadiyê ya PKK’ê, li hemberî gerîla gelekî bi hêrs e û ji bo tinekirina wan hemû derfetên xwe bi kar tîne, bêguman wê tecrîd û zexteke giran li Rêber Apo bike, ku wî bi xwe ev têkoşîn afirand. Ev du sal in em nizanin bê hev dibînin a nabînin. Ji Tîrmeha 2011’an û vir ve heft sal in parêzer û malbat nikarin wî bibînin. Kiryareke bi vî rengî li cihekî din ê cîhanê nîne. Kiryarên taybet ku li dijî şexsekî bi cih tên anîn. Tenê li dijî Rêber Apo tên bikaranîn. Rêber Apo bîst sal in li dijî vê yekê li ber xwe dide.”
ŞERÊ TAYBET Û PSÎKOLOJÎK TÊ
MEŞANDIN
Karasû destnîşan kir ku divê haya gel ji polîtîkayên li dijî Rêberê Gelê Kurd Abdullah Ocalan hebe û got, “Çawa ku li derve li êrîş li dijî têkoşîna azadiyê ya gelê Kurd tê kirin, zext û zordarî heye, li dijî Rêber Apo jî heman zext û êrîş hene. Tecrîda giran a li ser Rêber Apo ji ber vê yekê ye. Eger mirov dixwaze zexta li ser Rêber Apo fêhm bike, divê li zext û zordariya li gelê Kurd tê kirin binerin. Bîst sal in di her kêliyê de şerekî psîkolojîk li dijî Rêber Apo heye.”
