Navenda Nûçeyan
KJK’ê bang li gelê Kurd û di serî de jinên Kurd kir ku xwe bi rêxistin bikin û li dijî êrîşên faşîst helwesta xwe ya xweparastinê bilind bikin û got, gelê Kurd wê qetlîama dewleta Tirk ya dagirker qet qebûl neke
Derbarê êrîşên dewleta Tirk ya dagirker yên li ser Rojava û Herêmên Parastinê yên Medyayê Koordînasyona KJK’ê daxuyaniyeke nivîskî weşand.
KJK’ê di daxuyaniya xwe de êrîşên dagirkriya Tirk yên hewayî yên di 20’ê Mijdarê de li dijî Rojava, Rojhilat û Başûrê Kurdistanê pêk hatin şermezar kir û got: “Em zarokên hêja yên gelê xwe yên di van êrîşan de jiyana xwe ji dest dane bi rêzdarî bi bîr tînin û ji gelê me yê di êrîşan de birîndar bûne jî şîfayê dixwazin. Em sersaxiyê ji hemû gelê Kurdistanê re, di şexsê malbatên xwe yên ku xizmên xwe ji dest dane re dixwazin. Desthilatdariya çete ya faşîst AKP-MHP li pêşberî bilindbûna nirxên aştî, demokrasî û azadiyê yên ku bi paradîgmaya Rêbertiya me li welatê me, li herêmê û raya giştî ya cîhanê tengijiye.Hikumeta çete ya AKP û MHP tu carî dev ji polîtîkayên xwe yên qetlîamker bernedaye. Di çarçoveya van polîtîkayan de bi meşandina polîtîkaya tecrîd û îşkenceya li ser Rêbertiya me, weke ku tola nirxên azadiyê yên ku Rêbertiya me li Kurdistanê û li tevahiya cîhanê afirandiye, şer dimeşîne”.
KJK’ê da xuyakirin ku gel dizane ku desthilatdariya faşîst a AKP-MHP’ê amadekariya şerekî berfireh dike û wiha got: “Çawa ku di êrîşên dawî de jî hat dîtin, ev şer bi haydarî û destûra Rûsya û Amerîkayê tê pêşxistin. Gelê Kurd wê qet qetlîama dewleta Tirk a ku bi êrîşên bi şahidî û erêkirina Rûsya û dewletên NATO’yê pêk tîne, qebûl neke. Desthilatdariya faşîst a AKP-MHP’ê ku nikare şoreşa Rojava bifetisîne ya ku li ser mîrateya watedar û bi nirx a dîroka me ya têkoşînê ya 40 salî pêş ketiye û nirxên ku Kurdan bi dest xistine hedef digire.”
KJK’ê da zanîn ku Kobanê weke cihê şoreşa jinê ya destanî navê xwe di dîrokê de nivîsand û wiha dewam kir: “Desthilatdariya faşîst a AKP-MHP’ê ku nikare vê rastiyê qebûl bike, tinekirina vê îradeya rêxistinbûyî weke sedema hebûna xwe nirxand. Ev klîka faşîst, Şoreşa Rojava ji bo desthilatdariya xwe xeternak dibîne, ji yekîtiya azad û demokratîk a gelan ditirse. Êrîşa wê nîşaneya tirsa wê ya ji vîna jinê ya rêxistinkirî û hêza hevpar a gelan e. Di rewşa niha de desthilatdariya faşîst a AKP û MHP’ê li welatê me, Tirkiye, Rojhilata Navîn rîskê çêdike, xwe li ser xwîn, zayendperestî û nijadperestiyê ava kiriye û ji van tiştan sûdê werdigire”.
’Li ber xwe bidin û têkoşîna demokratîk mezin bikin’
KJK’ê bang li hemû gel û di serî de jinên Kurd kir ku xwe bi rêxistin bikin û li dijî êrîşên faşîst helwesta xwe ya xweparastinê bilind bikin û wiha got: “Em bang li raya giştî ya demokratîk, sazî û rêxistinên Tirkiye, herêm û cîhanê dikin ku li dijî êrîşên çeteyên faşîst ên AKP-MHP’ê yên li her çar parçeyên Kurdistanê zêde bûne, li ber xwe bidin û têkoşîna demokratîk mezin bikin.”