Endamê rêveber ê Buroya Rêxistinan a Meclisa Sivîl a Reqayê Tirkî El-Dendel hemû rêxistin û komeleyên ruxset girtine û li Reqayê kar dikin, rexne kirin û got ku hejmara rêxistinan li Reqayê zêde bûye, lê alîkariyên pêwîst nadin welatiyan.
Piştî bajarê Reqa ji aliyê şervanên QSD’ê de ji çeteyên DAIŞ’ê hate rizgarkirin, rêxistin û komeleyên alîkariyan ên ruxset ji Meclisa Sivîl a Reqayê girtine, zêde bûn. Endamê Rêveber ê Buroya Rêxistinan a Meclisa Sivîl a Reqayê Tirkî El-Dendel derbarê kar û xebatên wan rêxistinan de axivî û diyar kir ku hejmara rêxistinan zêde bûye, lê wekî tê xwestin erka xwe pêk naynin.
El-Dendel, da zanîn ku hejmara rêxistinan derdora 43’yan e, lê di pratîkê de tenê 4 an jî 6 rêxistin hene û kar dikin û ev tişt anî ziman: “Tevî rêxistinên behsa mijarê ruxsetên xwe li gel Meclisa Sivîl a Reqayê çêkirin, lê bi hinceta ku mayin hene, nikarin tevgerê bikin, erka xwe pêk naynin.”
El-Dendel, da zanîn ku rêxistin îdayên ne rast dikin û wiha dewam kir: “Dibêjin ku bajarê Reqayê tijî mayîn e. Çawa wiha dibe û Reqa tijî welatî ne. Şêniyên piraniya taxên Reqayê vegeriyane û tax tijî ne. Mayin hatine paqijkirin, lê hin mayinên ku nehatine dîtin hene, lê ew ne li cihên niştecîbûnê ne. Hemû mayinên li ber çavan bûn hatine bêbandorkirin û niha Reqa tijî mirov e.”
Endamê rêveber ê Buroya Rêxistinan a Meclisa Sivîl a Reqayê Tirkî El-Dendel di dawiya axaftina xwe de diyar kir ku Meclisa Sivîl a Reqayê tevî bêderfetiyan jî alîkariya welatiyan dike û bang li hemû rêxistinan kir ku erka xwe pêk bînin û alîkariyê pêşkêş bikin.”…ANHA
Rêxistinên mirovî erka xwe pêk naynin
