Mesûd Hesen ji gundê Moseka yê girêdayî herêma Raco ku beriya demekê ji herêma Şehbayê vegerîbû Efrînê, ji ber kiryarên leşker û çeteyên dewleta Tirk careke din ji Efrînê reviya.
DERIYÊN MALAN DIŞKÎNIN
Hesen destnîşan dike ku piştî êrîşên dewleta Tirk û çeteyên wê ji Efrînê bi mecbûrî derket. Bi qasî du mehan li herêmên Şehbayê ma. Lê di encama têkîliyên xwe bi hundir re ku her digotin; tiştek nîne, vegerin, rewş baş e! Hesen tê xapandin û tevî jin û du zarokên xwe vedigere gundê Moseka yê girêdayî herêma Raco. Hesen dibêje; çawa me nêzîkî li Efrînê kir leşker û çeteyên dewleta Tirk mobailên me girtin û em qewitandin. Hesen dewam dike; piştî ku em ji noqteya leşker û çeteyan bi qasî çend seatan bi dûr ketin, bi qaçaxî em derbasî gund bûn. Lê di heman rojê de leşker û çeteyên dewleta Tirk êrîşî gundê me kirin û deriyên malan bi pehînan şikandin. Ji bo ku gund vala bikin bê serûber gule direşandin. Hesenê wê çaxê têdigihêje ku ew hatiye xapandin û roja din direve bajarê Efrînê.
MÛÇE NABIN, MAL
DIDIZIN
Li wir jî hesen bi riya hinek kesan li serwîsekê siwar dibe ku dibin bajarê Ezazê. Ji wir diçe Ceralblus û piştre jî Minbicê. Hesenê xapandî piştî ku şeva xwe li Minbicê diqedîne derbasî Helebê dibe û ji wir jî tê Şehbayê. Hesen radigihîne ku ev pêvajoya wî ya çûn û hatinê bi qasî 20 rojan ajot. Têde zêdeyî 200 Hezar lîreyên sûrî xerc kiriye.Hesen tekez dike ku li gundê wan li kêleka leşkerên dewleta Tirk çeteyên Hemzat, Firqeya Nehemîn û gelek komikên dîtir dizî û talaniyê dikin û dibêje: çeteyan ji me re gotiye dewleta Tirk mûçeyên me biriye, em jî her we bigirin û pereyên we bibin.
AVEKÊ JÎ HÛN NIKARIN VEXWIN
Dawiyê de Hesen bang li şêniyên Efrînê dike û dibêje: Guh nedin bangên xapînok. Mirovê di bin nîrê dagirkeriyê de nikare bi serbestî bijî. Tişta li ser erdê diqewime naşibe gotinan. Mirov di bin siya dagirkeriyê de nikare avekê jî bi azadî vexwe.
Idrîs HENAN
