Piştî destpêkirina mewsîma berhevkirina sebzeyan li Eyn Îsa, buhayê sebzeyan nîvenîv daket û vê yekê jî hişt ku bazarên herêmê geş bibin. Şêniyên herêmê ji ber erzanbûna buhayên sebzeyan kêfxweşiya xwe anî ziman.
Bi destpêkirina mewsîma berhevkirina sebzeyên havînê re li herêma Eyn Îsa ya girêdayî kantona Girê Spî, buhayên sebzeyan bi rêjeya ji sedî 60 ji mehên berê kêmtir bû. Sedema kêmbûna buhayê sebzeyan ew e ku pir hatine çandin.
Li herêmê gelekî sebze tê kirîn û firotin, ji ber ku buhayê sebzeyan erzan bûye û ji bo veşartina zivistanê bi rêya kîsên veşartinê bi kêr tê. Her wiha sebze bi başbûna xwe ya tendurist tên zanîn.
Xwediyên firoşgehan û şênî didin zanîn ku buhayê sebzeyan gelekî erzan bûye û ne wekî mehên borî ye. Di demên berê de buhayê firingiyan digihîşt 300 LS (lîrayên Sûriyeyê) lê di demên dawîn de heta 125 LS’yan daketiye.
Erebeyên tijî sebze her roj berê xwe didin bazarên navçeyê da ku cotkar berhemên xwe bifiroşin û ev yek dihêle ku tevgera sûkê bi rengekî giştî zêde bibe.
Di vê derbarê de cotkarê bi navê Siûd El-Ebdûlah da zanîn ku şêniyên gundewaran debara xwe, xwe bi xwe dikin û çandina sebzeyan di erdê wan bi xwe de dihêle û ku bi buhayê herî kêm bifiroşin.
Xwediyê firoşgeha sebzeyan Nayif El-Şewîn jî da zanîn ku buhayê sebzeyan erzan bûye, ji ber ku cotkaran dest bi berhevkirina sebzeyên havînê kiriye.
Welatiyên bi navên Mihemed El-Îsa û Ebdurezaq El-Ismayîl jî da zanîn ku sebzeyên li bazarê tên peydakirin, buhayê wan kêm e û bi xwe jî baş in…ANHA
Bi erzanbûna sebzeyan sûk geş bûn
