Xwepêşandanên li Iraqê berdewam dikin

Xwepêşandan û aloziyên li parêzgeha Besrayê destpê kir, li Bexda, Necef, Zîkar û Kerbelayê berdewam dike û têgotin ku wê pêla xwepêşandanan li herêmên din jî belav bibe. Serokwezîrê Iraqê ji bo dawî li xwepêşandanan were diyar kir ku ewê 3.5 milyar dolar bûdce ji bo van herêman veqetînin.
Ev zêdeyî hefteyeke niştecihên parêzgeha Besrayê bi sedema kêmbûna ceyran û xizmetguzariyê di xwepêşandanê de ne. Ev çend roje xwepêşandan berbelavê parêzgehên din yên Iraqê jî bû. Li paytext Bexda (Meydana Tehrîr), Besra, Mîsan, Necef, Kerbela û Zîkarê xwepêşandan berdewam dike û tê gotin ku dibe li parêzgehên din jî belav bibe.
Li Kerbela û Besrayê xwepêşander ser avahiya Walîtiyê de girtin û di encamê de alozî di navbera hêzên ewlekarî û xwepêşanderan de derket.
Li ser zêdebûna aloziyan Serokwezîrê Iraqê Heyder Ebadî serdana Besrayê kiribû û bûyeran di cih de şopandibû. Li gorî ragihandinên Iraqê, Ebadî 3 milyar û 500 milyon dînar bûdce ji bo pêwîstiyên parêzgeha Besrayê veqetandiye. Her wiha têgotin ku Ebadî fermandaye ku parzûngeha avê û xizmetên tendûristiyê jî ji bo herêmê pêk bînin.
Her wiha hinek ragihandin jî îdîa dikin ku artêşa Iraqê hêzên ewlekariyê ji Kerkûkê vekişandiye, ji bo sewqê parêzgehên alozî lê hene bikin.
Heya niha bi sedan kes di van xwepêşandanan de birîndar bûne û hêzên ewlekariyê li hemû parêzgehên Iraqê hatine bi cih kirin. Di heman demê de li hinek parêzgehên ku alozî lê derketine qedexeya derketina derve hatiye ragihandin.