Kargeha Vîna Jinan li kantona Kobanê bi tevlêbûna 10 jinan di çarçoveya xebatên amedekirina pêdiviyên zivistanê de dest bi kar kiriye.
Kargeha Vîna Jinan ku sala par ji bo amedekirina pêdiviyên zivistanê hatibû vekirin, ev mehek e dîsa dest bi xebatên xwe kiriye.
Di kargehê de 10 endamên jin ên kantona Kobanê dixebitin, kargeh jinên ku pêwîstiya xwe bi kar heye, deriyê xwe jê re vedike û wan di kar de bi cih dike.
Bi taybet jinên ku xwendina wan tune ye û nikarin cihê xwe di tu saziyan de bigirin, dikarin cihê xwe di vê kargehê de bigirin û pêwîstiyên xwe yên jiyanî bi dest bixin.
Heta niha jinên kargehê gelek pêdiviyên zivistanê amade kirine, wekî dimsê firingiyan, firingiyên hişkkirî, fasuliyên hişk, nok, bezêla, pel, kundir û bacanên hişkkirî, reçela mişmişan û reçela kerezê, her wiha wê gelek tiştên din jî di demên pêş de amade bikin.
Hesabgira Kargeha Vîna Jinan Şêrîn Hacî têkildarî xebata kargehê axivî û wiha got: “Me ev kar bi taybetî ji bo jinên ku xwendina wan tune ye û nikarin di tu saziyan de kar bikin, vekir û em dixwazin hemû jin cihê xwe di nava vê xebatê de bigirin.”
Her wiha xebatkara bi navê Fatma Ehmed anî ziman ku xebata wan baş diçe û kêfa wan ji kar re tê û ew bi karê destê xwe pêwîstiyên xwe yên jiyanî bi dest dixin…ANHA
Kargeha Vîna Jinan amadekariyên zivistanê dike
