Dayika Erîfe Osman ku ji ber êrîşên dewleta tirk li Şehbayê bi cih bûye û têkoşîna xwe li wir didomîne got: “Zextên dagirkeran wê nikaribe vîna me bişkîne. Em berxwe didin û em ê berxwe bidin.”
Dayika Erîfe Osman a ji Hûlîlêya Efrînê û dayika 10 zarokane. Erîfe ji ber êrîşên dewleta tirk yên li ser Efrînê li Şehbayê bi cih bûye û têkoşîna xwe li wir didomîne. Erîfê diyar kir ku ew ê heta dawî têbikoşe û hêviya xwe ya vegera Efrînê winda neke.
Dayika Erîfe Osman wiha got: “Ez û zarokên xwe li Gundê Hûlîlîyê dijiyan. Berî ku dewleta tirk êrîşî me bike em bi awayekî ewle dijiyan. Lê piştî ku dewleta tirk êrîş kir em derbasî navenda Efrînê bûn. Lê piştî ku Efrîn jî hat bombebarankirin em derbasî Şehbayê bûn. Dema ku dewleta tirk êrîşî Efrînê kir bû sedema qetilkirina gelek sîvîlan.”
Dayika Erîfeyê anî ziman ku ji bo debara xwe bike ew şimikan difiroşe û wiha dawî li axaftina xwe anî: “Tevî hemû zor û zehmetiyên şert û mercên koçberiyê ez û zarokên xwe em berxwe didin û em hêvî dikin ku dê Efrîn rizgar bibe.”…JINNEWS