Navenda Têkliyên Dîplomasî ya Tevgera Civaka Demokratîk TEV-DEM’ê girêdayî rewşa li Efrînê û buyerên li Deraayê rû didin û xebatên avakirina komîteya destûrî de daxuyaniyek da weşand.
Daxuyanî li Navenda Têkliyên Dîplomasî ya TEV-DEM’ê yê li Qamişlo yê bi amadebûna gelek dezgehên çapemenî hate dayîn. Daxuyanî ji aliyê Berdevkê Navenda Têkiliyên Dîplomasî yê TEV-DEM`ê Kemal Akif ve hate xwendin.
Di daxuyaniyê de hate gotin ku artêşa Tirk a dagirker û komên çete yên girêdayî wê li Efrînê asta hovîtiya xwe bilind dikin û hemû pîvan û qanûnên navnetewî binpê dikin. Her wiha hate gotin ku buyerên li Deraayê rû didin nayê wateya çareseriya aloziya Sûriyê û divê rêjîm baş nas bike ku çareserî bi çalakiyên leşkerî pêk nayê.
Rewşa li Efrînê:
Destdirêjî û kirinên dewleta Tirk li Efrînê her diçe dijwartir dibin û hemû pîvan û qanûnên navnetewî binpê dikin. Evan destdirêjî di çarçoveya qirkirina gelekî berxwedêr de pêk tê. Gelek raporên navnetewî derketin û li gorî van raporan piştrast dibe ku evan destdirêjiyên li dijî welatiyên Efrînê binpêkirina pîvan û rêgezên mafên miorvan e. Ti alîkarî bi koçberên Efrînê re nayê kirin. Tirkiye dewleteke dagirker e û hebûna wê li giştî Sûriyê metirsiyeke mezin e. Her wiha li dijî hemû parçeyên Kurdistanê siyaseta qirkirinê dide meşandin. Tişta ku li Başûrê Kurdistanê rû dide berdewama siyaseta Tirkiyê ya li Efrînê ye. Tirkiye bi hemû hêz û derfetên xwe hewl dide hebûna gelê Kurd li her deverekê tune bike. Pêdivî bi helwesteke Kurdî ya xurt heye û ev helwest jî girêdayî lidarxistina Kongreya Netewî ya Kurdistanê ye. Divê hemû aliyên Kurdistanê helwesta xwe nîşan bidin da ku ev kongre were lidarixistin û destkeftî bêne parastin.
Rewa li Deraa:
Rêjîma Sûriyê hê jî bawer dike ku serkeftinên leşkerî bingeha çareseriyê ye. Çareserî ne pêkan e bi pêşveçûnên leşkerî pêk were. Tişta ku li Deraa rû dide nayê wateya ku çareseriyek ji aloziya Sûriyê re tê danîn. Divê rêjîm baş nas bike ku ji ber guhertinên pêk hatine nepêkan e weke berê vegere. Pêwîstiya çareserkirina aloziya Sûriyê bi diyalog û çareseriyeke aştiyane heye. Her wiha pêwîstî bi destûreke nû heye da ku mafên hemû pêkhateyên Sûriyê têde bêne parastin. Ev destûr divê destûrekî demokratîk be û ji aliyê hemû welatiyên Sûriyeyê ve bête hûnandin. Destwerdanên herêmî û navnetewî ji bo amadekirina lîsteyên komîteya destûrî hewldaneke nayê qebûlkirin û em bi temamî red dikin. Em dixwazin ber bi avakirina Sûriyeke nû ve biçin. Lihevkirina aliyên Sûriyê di pêkanîna çareserî, aramî û demokrasiyê de bingeh e.”
Bi rêbazên leşkerî çareserî pêk nayê
