Çalakiya Mertalên Zindî ya Rêxistina Ciwanan a ku li dijî dagirkeriya dewleta Tirk li Qendîlê dane destpêkirin dewam dike. Ciwanên Wargeha Mexmûrê piştgirî dan çalakiya mertalên zindî ya ciwanan a li Qendîlê û diyar kirin ku wê hevkariya Barzanî û Erdogan ya li dijî gelê Kurd wê ser nekeve.
Ciwanên Wargeha Mexmûrê piştgirî dan çalakiya mertalên zindî ya ciwanan a li Qendîlê û dagirkeriya dewleta Tirk a li ser xaka Başûrê Kurdistanê şermezar kirin.
Çalakiya Mertalên Zindî ya ji aliyê Komeleya Ciwanên Welatparêzên Kurdistanê û Rêxistina Jinên Ciwan ên Têkoşer ve li dijî dagirkeriya dewleta Tirk dayîn destpêkirin ku mehek li pey xwe hişt, dewam dike. Mertalên Zindî ji bo beşdarbûna bîranîna ku wê di 14’ê Tîrmehê de bi boneya salvegera Berxwedana Zindanê li Qendîlê were lidarxistin, banga beşdarbûnê li ciwanên Başûrê Kurdistanê kirin.
Ciwanên Wargeha Mexmûrê têkildarî piştgiriya ji bo çalakiya mertalên zindî ya li Qendîlê axivîn.
Ciwanê bi navê Mazlûm Tok bal kişand li ser dagirkeriya dewleta Tirk a li Başûrê Kurdistanê û wiha got: “Ez weke ciwanek yê wargehê, dagirkeriya li ser Başûrê Kurdistanê şermezar dikim. Em wek gelê Kurd û bi taybet wek ciwanên wargehê, piştgiriya ciwanên ku li Qendîlê bûne mertalên zindî dikîn. Di van demên dawî de em dibînîn Barzanî hîn zêdetirîn dijbertiya xwe ya li himberî gelê Kurd dide pêş û her ku dem derbas dibe li şûna ku dewleta Tirk wek dagirker bide diyar kirin, PKK wek dagirker diyar dike. Ev jî bi xwe re xayîntiya di nava Kurdan de kûr dike û bi vî awayî dixwaze yekîtiya gelê Kurd xira bike.”
Jina ciwan ya bi navê Çîdem Demir jî dagirkeriya Başûrê Kurdistanê wiha nirxand: “Ez ji weke jinek ciwan a li Wargeha Mexmûrê piştgiriya ciwanên ku li Qendîl bûyîn mertalên zindî dikim. Hêvîdarim ku ciwanên Başûr û giştî ciwanên Kurdistanê xwedî li xaka Başûrê Kurdistanê derkevin û rê nedin dewleta faşîst ya Tirk û hevkarên wê.”
Cîwanê bi navê Cîhat Gûngen nerazîbûna xwe ya li hemberi dewleta Tirk nîşan da û got : “Ez jî wek ciwanek yê Wargeha Şehîd Rûstem Cûdi, berxwedana ciwanên Başûrê Kurdistanê ya ku li Qendilê ev meheke ku xwe kirine mertalên zindî û li himber lîstokên dewleta Tirk serî natewînin silav dikim. Em dagirkeriya dewleta Tirk ya ku li ser Başûrê Kurdistanê dide meşandin şermezar dikin, pêwîste em wek ciwan nehêlin ku ev lîstokên qirêj yên li ser gelê Kurd bên kirin. Em ji weke ciwanên Mexmûrê pêwîste li vîn û axa xwe xwedî derkevîn.
Ciwanê bi navê Berxwedan Kara jî ev tişt anî ziman; “Ez jî wek ciwanek yê wargehê, di serî de silavên xwe ji bo ciwanên di koma mertalên zindî de cih girtîn û hemû ciwanên berxwedêr re dişînim. Ev dagirkeriya dewleta Tirk ya ku li ser Başûrê Kurdistanê pêktîne, em şermezar dikin, divê ciwanên me yê her çar parçeyên Kurdistanê bêdengiya xwe li hemberî van dagirkeran bişkine. Ew hevkariya ku Barzanî û dewleta Tirk a ku li himber gelê Kurd dike, nikare vîna Gelê Kurd têk bibe.”…ROJNEWS
