Dayîka Eyşe ya 105 salî ku niha li gundê Um Hoş yê Şehbayê dimîne da zanîn ku daxwaza wî ya dawî rizgarkirina Efrînê bibîne û vegere Efrînê. Dayî Eyşeyê got, “polîtîkayên ku berê di dema Îngiliz, Fransî û Osmaniyan de li ser Kurdan dihatin kirin îro jî dîsa dewam dikin.”
Dayika bi navê Eyşe Necar a 105 salî ku bûye şahidê qirkirinên li ser gelê Kurd, anî ziman ku daxwaza wê ya herî dawî ew e ku Efrîn ji dagirkeran rizgar bibe û vegere ser axa xwe.
Dayika Eyşê ya 105 salî ku ji gundê Um Hoş a Şehbayê ye, xwediyê 12 zaroka ye. Dayika Eyşê heta temenê xwe yê 105 salî bûye şahidê gelek hovîtî, tunekirin û qirkirina li ser gelê Kurd ku pêk hatine. Dayika Eyşeyê da zanîn ku ji dîrokê heta niha gelê Kurd bi polîtîkayên tunekirin û qirkirinê rû bi rû mane û timî axa wan hatiye dagirkirin.
Dayika Eyşeyê da zanîn ku ew bûye şahidê dagirkeriya Îngiliz û Fransiyan a li ser axa Kurdistanê û got: “Dema em li dîroka gelê Kurd dinêrin her dem bi êş û kulê derbas bûye. Lê gelê Kurd dîsa jî serî netewandiye. Li dijî dagirkeriya Îngliz, Fransiz, Osmaniyan her dem li ber xwe daye. Ez bûm şahidê dagirkeriya Îngiliz û Fransiyan. Di wê serdemê de jî dîsa sîvîl dihatin qetilkirin û revandin. Wê demê wan jî gelek zilm li gelê Kurd kirin. Berê Osmaniyan gelê Kurd qetil dikirin, niha jî di bin navê Komara Tirkiyê de axa gelê Kurd tê dagirkirin û bi hezaran kes tên qetilkirin.”
JIN DÎSA DIBIN HEDEF
Dayika Eyşeyê destnîşan kir ku berê jî jin hedef dihatin girtin, niha jî hedef tên girtin û wiha dewam kir: “Ji dîrokê heta niha jin her bûne qurbana polîtîkayên qirkirinê û hedef hatine girtin. Niha jin dîsa hedef tên girtin. Jinê her dem li dijî polîtîkayên qirkirinê li ber xwe dane. Niha jî li ber xwe didin.”
EZ DIXWAZIM VEGERIM EFRÎNÊ
Dayika Eyşeyê destnîşan kir ku daxwaza wê ya herî dawî ew e ku vegere Efrînê û wiha dawî li axaftina xwe anî: “Min heta temenê xwe yê 105 salî gelek tişt dîtin, ez gelek tişt jiyam. Tiştê ku heta niha herî bandor li ser min kiriye têkoşîna tevgera azadiya Kurd e û daxwaza min a herî dawî jî ew e ku ez vegerim Efrînê.”…JINNEWS
