Bi armanca zêdekirina koordîneya her du aliyan û xurtkirina ewlehiya bajêr, Meclisa Têkiliyên Leşkerî ya Giştî ya QSD’ê civînek ji rûspiyên êlên Ereban ên li Reqayê re li dar xist.
Endamên rêveber ên Meclisa Sivîl a Reqayê û nûnerên gel yên herêmê beşdarî civînê bûn. Di civînê de şêxê êla El-Neîm Heme El-Elî li ser girîngiya koordîneya di navbera QSD’ê û welatiyên Reqayê de ji bo parastina ewlehiya herêmê axivî.
El-Elî destnîşan kir ku hemû pêkhateyên herêmên Bakurê Sûriyê piştî rizgarkirina herêmê ji çeteyên DAIŞ’ê, di nav hevbeşiyekê de dijîn.
Endamê Meclisa Têkiliyên Leşkerî ya QSD’ê li bajarê Reqayê Çiya Ehmed jî diyar kir ku ew ji bo parastina hemû welatiyan û ji bo bicihanîna rêgezên neteweya demokratîk û jiyana hevbeş di nav hemû pêkhateyan de kar û xebat dimeşînin.
Şêx û rûspiyên êlên Ereban pêşniyarên xwe derbarê ewlehiya herêmê de kirin. Şêxê êla El-Sexanê jî da zanîn ku ew bi awayekî asayî van civînan bi QSD’ê re li dar dixin, nêrîn û pêşniyarên rûspiyên êlên Ereban digirin…ANHA
