Hevseroka şaredariya Binarê Qendîl diyar kir ku ew li benda bersiva Parlamentoya Herêma Kurdistanêne û destnîşan kir ku ger helwestek a parlamentoyê nebe ewê serî li Bexdayê bidin.
Roja 8’ê Tîrmehê şandeyek ji nûnerên welatiyên Binarê Qendîlê serdana Parlamentoya Başûrê Kurdistanê kirin. Şande ji aliyê Sekretera parlamentoyê ve hatibû pêşwazîkirin. Şandeya welatiyan daxwazên xwe radestî parlamentoyê kirin.
Li ser serdana parlamentoyê Hevseroka Şaredariya Binarê Qendîlê Gulale Osman axivî û got; “Bersivek a parlamentoyê çênebû, wê daxwazên me bigihînin hikûmetê ku li ser biaxivin. Di serdana me ya ji bo parlamentoyê de soza civînek taybet a li ser dagirkeriyê nehat dayîn. Tenê soza wê dan ku lijneyek ji endamên parlamentoyê, ji bo serdana gundên Binarê Qendîl bikin dan. Herwiha gotin wê ew lijne serdana cihên ku ji aliyê dewleta Tirk ve hatîn bombebaran kirin jî bikin.”
Hevseroka Şaredariya Binarê Qendîlê Gulale anî ziman ku wan dema berê de jî serdana parlamentoyê kiribûn, lê tu encamek bi dest nexistbûn. Gulale diyar kir ku ewê di daxwazên xwe de bi israr bin.
Di dawiyê de Gulale got; “Parlamentoya Başûrê Kurdistanê nûnertiya xelkê Başûrê Kurdistanê dike. Ji bo vê me daxwazên xwe pêşkêşî wan kir. Lê ger ti helwestek wan nebe, dibe ku em serdana Parlamentoya Iraq bikin.”…ROJNEWS
Ger bersivê nedin em ê biçin Bexdayê
