Li çar parçeyan em piştgiriya Kurdan dikin

Endamê Civata Niştîmanî yê Tevgera Goran Karwan Haşim eşkere kir ku li her çar parçeyên Kurdistanê li cem bidestxistina mafên gelê Kurd in.
Endamê Civata Niştîmanî yê Tevgera Goran Karwan Haşim derbarê gefên Wezîrê Karê Derve yê Tirk Mevlut Çavuşoglu ku dibêje, ‘Rêveberiya Hewlêr û Bexda piştgiriya êrîşên me yên ser PKK’ê dikin, lê Tevgera Goran û YNK piştgiriya PKK’ê dikin û wê berdêla vê bidin’ de axivî.
Endamê Civata Niştîmanî yê Tevgera Goran Karwan Haşim diyari kir ku li her çar parçeyên Kurdistanê piştgiriyê didin ku Kurd mafên xwe bi dest bixin. Karwan got, “Ti hêz nikare xewnên gelê Kurd ên li her çar parçeyên Kurdistanê têk bibe. Lewma em li her çar parçeyên Kurdistanê li gel çareseriya aştiyane ne.”
Haşim wiha dewam kir, “Herî zû weke Tevgera Goran me gotinên Çavuşolgu red kir. Mixabin, pêwîst bû hikûmeta Herêma Kurdistanê bihata ser xetê. Ji ber ku dewleta Tirk dixwaze cudahiyê bixe di navbera Hewlêr û Silêmaniyê de. Niha qada hewayî ya Silêmaniyê rawestandiye. Em hikûmeta Herêma Kurdistanê û Tirkiyê berpirsê van karan dibînin. Em helwesta van herdu hikûmetan red dikin.”
Endamê Civata Niştîmanî yê Tevgera Goran Karwan Haşim herî dawî bal kişand ser zextên dewleta Tirk ên li ser Herêma Kurdistanê û got; “Ev helwesta niha ya Tirkiye li hemberî Silêmaniyê dike, Serokwezîrê Herêmê û bi giştî hikûmeta Herêma Kurdistanê berpirsyare.”…ROJNEWS