Li Wargeha Penaberan a Şehîd Rustem Cûdî (Mexmûr) ji bo şervanê QSD’ê Xebat Marînos ku di 8’ê Sibatê de li Hesekê şehîd bûbû, konê sersaxiyê hat vedan. Di merasima bîranînê de bavê şehîd got, em bi şehadeta kurê xwe serbilind in û heta dawiyê emê li pey doza şehîdên xwe bin.
Li Wargeha Penaberan ya Şehîd Rustem Cûdî (Mexmûr) ji bo şervanê QSD’ê Xebat Marînos konê sersaxiyê hat danîn. Şêniyên wargehê û her sê meclîsên wargehê serdana konê sersaxiyê kirin. Merasîma sersaxiyê bi deqeyek rêzgirtin ji bo tevahî şehîdên Tevgera Azadiya Kurdistanê destpê kir.
Piştî rêzgirtinê li ser navê gelê wargehê Rubar Îlhan axivî. Îlhan di destpêka axaftina xwe de sersaxî ji Rêber Apo, Malbata şehîd û gelê Kurd yê welatparêz re xwest û wiha got: “Kesayetên mîna Şehîd Xebat di têkoşîna me de cihek pir girîng digrin. Em wan bi minetarî bibîrtînin û soza şopandina rêya wan didin. Wek Rêber Apo jî dibêje ‘Ez wargehê bikim sembola Kurdistanê.’ Ji ber vê yekê em bûne hêviya gelên bindest, emê berdewam jî bikin.” Piştre li ser navê malbatê bavê şehîd, Ehmed Orhan axîvî.
‘Em bi şehîdên xwe serbilind in’
Ehmed Orahan bal kişand li ser bexwedaniya gelê Kurd û wiha got: “Em wek penaberên siyasî her tim bûne hedefa dijmin, berxwedaniya me wisa kir ku dijmin ji me bitirse. Bi dehan balefiran erîşî me kirin, em vê şermezar dikin û dibejin, em Kurdin, nasnama me Kurde, Cil û bergê me Kurdiye, axa ku em li ser jiyan dikin jî Kurdistane. Heta ku yek kes ji me bimine jî emê berxwe bidin û li pey doza şehîdên xwe bin. Em bi şehîdên xwe serbilindin, divê dijminên me serê xwe li hember berxwedaniya Kurdan bi çemîne.”
Piştî axaftinan serdan bi dirûşmên ‘Şehîd namirin’ û ‘Bijî Serok Apo’ bi dawî bû.
ROJNEWS/Mexmûr
