Lêzan EVDIKÊ/Qamişlo
Di çarçoveya çalakiyên çandî yên heftane de, bi navê” Çîrok civakek e ku diaxive ” li bexçeyê xwendinê roja Çarşema borî, Yekîtiya Rewşenbîrên Herêma Cizîrê şevbiwêrkek li dar xist.
Şevbiwêrk ji bo nivîskar û rojnemevan Ebdurehman Mihemed bû. Mijara şevbiwêrkê çend çîrok ji pirtûka wî ya bi navê “Nîşeyên Fetisî” bûn. Ebdurehman Mihemed sê çîrokên xwe; yek bi navê “Kûpa Naşkê”, ya din bi navê” Hêk Baş e”, ya sisyan jî bi navê “Masa Hejmar 3” xwendin. Hem çîrokên xwendîn, hem çîrokên di pirtûkê de tev li ser êş, gilî, koçberkirina bi darê zorê û mijarên cuda yên jiyana civaka Sûriyê ne.
Çawa ku tê zanîn, nivîskar û rojnamevan Ebdirehman Mihemed welatiyê bajarê Qamişlo ye û endamê Yekîtiya Rewşenbîran ya Herêma Cezîrê ye. Di hemen demê de di rojnameya me de nûçegihanî û edîtoriyê dike. Herwiha sê pirtûkên wî yên bi navê “Kaxezên Kurdistanê, Evîn di demên qedexeye de û Nîşeyên Fetisî ” hene.
Nivîskar Ebdirehman Mihemed, di destpêka şevbiwêrkê de wiha got: “Armanca vê şevbiwêrkê nîşandana êşê û sekneke qayîm li hemberî pirsgirêkan e. Lê Ji bo hilbijartina van her sê çîrokan, bi taybetî min xwest balê bikişînim ser sê mijarên girîng. Mîna çîroka “Kûpa Naşke” êşa koçberan dide xuyakirin. Di heman demê de wêneyên bîranînên zaroktiyê û dilpakiya wan di çîroka hêkê de tê pêşkêşkirin. Herwiha çîroka li ser êşa jinekê ka çawa bi şert û mercên jiyanê re li ber xwe dide, dema mêr dev jê berdide û tenê dimîne, têkiliya ruhê xwe bi welat nîşan dide, di çîroka Masa Hijmar 3 de hatiye diyarkirin. ”
Çalakiyên çandî, yên heftane, ku ji bo heskiriyên çand û wêjeyê bûne qiblegeh, li Baxçeyê Xwendinê dewam dikin.