Navenda Nûçeyan/Qamişlo
Ji sala 1977an heta roja me ya îro, li ser xaka Kurdistanê bi hezaran şehîd çêbûne. Bi artêşeke ji şehîdan dîrokeke nû ji gelê Kurd re hatiye nivîsîn. Ew dîrok bi şehîdbûna Haki Karer, şehîdê yekê yê Koma Azadiyê hat destpêkirin. Herikîna rastî û azadiyê ji wê rojê ve dest pêkiriye û heta roja me ya îro didome.
ŞEHÎD RASTIYEKE ZINDÎ NE, ÇAVKANIYA HÊZ, MORAL, BÎR Û BAWERIYÊ NE
Haki Karer yek ji damezrînerên Tevgera Azadiyê bû. Li Dîlokê xebateke mezin kir. Bi sedan ciwanên Kurd bi rêxistin kirin. Kesayeteke zanyar û pir wêrek bû. Hem rêveberekî xwezayî, hem cîgirê rêber Apo bû.
Endamê Komîteya Azadiya rêber Apo ya bakur û rojhilatê Sûrî Ferzende Munzir, derbarê roja şehîdbûna Haki Karer de wiha axivî: “Salvegera şehîdbûna pêşeng û rêvberê Tevgera Azadiyê, heval Haki Karer bîr tînim. Şehîd Haki Karer şoreşgerekî enternasyonal bû, bi şehadeta wî û bi şehîdên heyva Gulanê em îro berxwedanê dikin.”
BÛ HEDEFA BÊBEXTIYEKE MEZIN
Haki Karer 18ê Gulana 1977an bû hedefa Stêrka Sor ya bi destê dewleta tirkî hatî damezirandin û bi PDKê ya Başûr ve girêdayî.
Ferzende diyar kir ku ji bo şkandina Tevgera Azadiyê Haki Karer bû hedef. Armanca Stêrka Sor ya kuştina heval Haki ew bû ku ji şoreşgeran, rêber Apo û gelê Kurdistanê re bêje, êdî bes e eger hûn gaveke din biavêjin wê çarenûsa we ev be.
Ferzende herwiha da xuyakirin ku şehîdbûna Haki Karer bandoreke mezin li ciwanên Kurd kir û wiha pê de çû: “Ciwanên Kurd biryara tolhildanê li dijî tevgera Stêrka Sor dan, lê bersiva rêber Apo cuda bû, got, şehîd Haki Karer ruhê min yê veşartî bû û bi vê êrişê xwestin milê min yê rastê qut bikin. Ew şehîdê biratiya gelan e. Rêber Apo dibêje, şehîdbûna Haki lêpirsîneke mezin ji min re çêkir û du rê li pêşiya me bûn. Yek jê em li şehîd Haki xwedî derkevin û xwe bi rêxistin bikin, ya duduyan em soz û xewna şehîd pêk neynin.
Bi şehîdbûna Haki rêber Apo biryarê dide ku li şehîdên xwe xwedî derkevin û bersiva Stêrka Sor bi damezirandina Partiya Karkerên Kurdistanê bidin. Armanc ji vê yekê gelê Kurd yê ji aliyê dijminê xwe ve ji her alî ve hatî tinekirin, jinûve zîndîkirin bû.
“DI TARIYÊ DE RONAHÎ Û DI ZEHMETIYÊ DE HÊZ Û BAWERÎ HETA SERKEFTINÊ”
Ferzende da zanîn ku bi şehîdbûna Haki Karer rêxistineke şoreşgerî hat damezirandin û axaftina xwe wiha domand: “Îro bi ruhê Haki, Çekdar û Mizgîn li her çar perçeyên Kurdistanê em têkoşînê dikin. Ev tekoşîne bi rêbaz û hêza tekoşîna Rêber Apo ye ku em dişopînin.”
Endamê Komîteya Azadiya rêber Apo ya bakur û rojhilatê Sûrî Ferzende Munzir axiftina xwe wiha bi dawî kir: “Ev sal wê bibe sala şkandin dewleta tirkî ya faşîst û azadiya rêber Apo. Di tariyê de ronahî û di zehmetiyê de jî hêz û bawerî wê heta serkeftinê be. Em şehîdbûna Haki û şehîdên heyva Gulanê bîr tînin. Bi destanên lehengî û qehremaniyê li Avaşîn, Metîna û Zapê emê bi ser kevin.”