Rojnamevanên Kurdistanî ji bo Zînî Wertê bang kirin

Rojnamevanên Kurdistanî têkildarî bûyea li herêma Zînî Wertê ya Başûrê Kurdistanê daxuyaniyeke hevpar weşandin.
272 rojnamevanan mohra xwe danî binê daxuyaniya hevpar. Daxuyanî wiha ye:
“Tengezariya li herêma Zînî Wertê ya Başûrê Kurdistanê rû da, her gavê dibe ku veguhere şerekî nû yê navbera hêzên Kurdan.
Di her şerê birakujiyê de Kurd her tim xisirîne û neyarên Kurdan ji vî şerî sûd wergirtine.
Dewleta Tirk ji roja destpêkê ve çav ber daye destketiyên Kurdan hemûyan. Ji bo ku desketiyên 4 beşên Kurdistanê ji holê rake çi ji destê wê hatiye kiriye.
Operasyonên dagirkeriyê yên li Rojava; helwesta wê ya dijminane ya li hember Referandûma Serxwebûnê ya Başûrê Kurdistanê; li Bakûrê Kurdistanê jî şewitandina însanan bi rengekî zindî li jêrzemînan û operasyon û girtinên ku heya niha jî didomin, çend ji mînakên li ber çavan e.
Dewleta Tirk bi hêzên xwe yên leşkerî û sîxûrî li gelek herêmên Başûrê Kurdistanê bi cih bûye û hewldanên xwe yên ku ji bo di navbera Kurdan de şerekî bide destpêkirin didomîne.
Eger hêzên Kurd barê dewleta Tirk û dewletên din ên kolonyalîst siviktir bikin, divê were zanîn ku wê Kurd hemû di binê vî barî de bimînin.
Divê demildest ev aloziya ku emnahî û destketiyên 4 beşên Kurdistanê dixe bin xetere, ji holê rabe.
– Divê hemû alî di pêngava pêşî de hêzên xwe yên eskerî ji Zînî Wertê paşve bikşînin.
– Piştre divê hevdîtînên rûberû destpê bikin; pirsgirêk bi rêya diyalogê werin çareserkirin.
– Tê zanîn ku destketiyên hêzên siyasî yên gelê Kurd ên herêmî hin caran wan neçar dihêlin bi dewletên kolonyalîst re jî bikevin nava diyalogê. Li gelê vê yekê jî, divê ev diyalog ne li dijî hêzên siyasî yên beşekî din û destketiyên wan û gelê Kurd bin.
– Ji bo ku di siberojê de nakokiyên bi heman rengî careke din rû nedin û pirsgirêk bi awayekî mayînde werin çareserkirin, divê hemû hêzên siyasî xebatên kongreya neteweyî ji nû ve bidin destpêkirin.