Tevî ku Rêveberiya Xweser biryar da ku pêwîst e karkerên ku rojane kar dikin ji xetera vegirtina Koronavîrusê bên parastin, lê ew dibin qurbana paşguhkirina berpirsên werşeyên kar û xwediyên zeviyan.
Rêveberiya Xweser a Bakur û Rojhilatê Sûriyê 13`ê Nîsanê komek biryarên girêdayî warê çandinî, cotkaran û karkerên ku di vî warî de kar dikin dan. Ji ber ku piraniya şêniyên herêmê debara xwe bi çandiniyê peyda dikin.
Rêveberiyê bi biryarên ku dane, tevgerên cotkar û karkeran di nav zeviyan de bi nêzîkbûna mewsima çinînê re hêsan kir. Lê bi şertê ku tevahiya tedbîrên xweparastinê ji koronavîrusê werin girtin. Her wiha divê berpirsên werşeyên kar û xwediyên zeviyan rêgezên silametiyê û dûrxistina karkeran ji hev di dema veguhestinê de û dema di nav zeviyan de kar dikin, pêk bînin.
Digel derketina van biryaran rewşa karkeran nehatiye guhertin. Berpirsên werşeyên kar û xwediyên zeviyan karkeran bi hejmarên mezin di erebeyên biçûk de vediguhêzînin. Bi vê yekê biryar û perspektîvên Rêveberiya Xweser ên di vî warî de bin pê dikin.
Tevî biryarên Rêveberiya Xweser jiyana karkeran nayê parastin
