Piştî qedexeya derketina derve li herêmên Bakur û Rojhilatê Sûriyê, navendeke tenduristiyê li bajarokê Xas ê girêdayî navçeya Dirbêsiyê hat vekirin. Navend bê pere nexweşên gundên girêdayî navçeyê derman dike.
Ji ber belavbûna Koronavîrusê Rêveberiya Xweser a Bakur û Rojhilatê Sûriyê tedbîrên pêwîst ji bo rêgirtina li pêşiya derketina vîrûsê li herêmê girtin. Yek ji wan tedbîran qedexeya derketina derve li herêmên Bakur û Rojhilatê Sûriyê ye.
Navenda Tenduristiyê ya li bajarokê Xas a ku hate vekirin, dê şêniyên gundên girêdayî navçeyê derman dike. Her wiha nexweşxaneya El-Elî ya taybet a li navçeyê tenê nexweşên navçeyê pêşwazî dike da ku şênî kom nebin.
Navend ji saet 09:00`an sibehê heya 13:00`an vekiriye. Derman û xebatên tenduristî bê pere ji şêniyan re têne pêşkêşkirin.
Girêdayî mijarê endamê rêveber ê Navenda El-Xas doktor Samir El-Nasir got: “Nexweşxaneya El-Elî ya li navçeya Dirbêsiyê ji bo pêşwazîkirina nexweşên navenda navçeyê hate diyarkirin. Me navendek li bajarokê Xas vekir bi armanca ku xebatên tenduristiyê ji şêniyên gundên girêdayî navçeyê re pêşkêş bikin.”
El-Nasir destnîşan kir ku ew bê pere nexweşan pêşwazî dikin û diyar kir ku amade ne alîkariya şêniyan bikin.
Ji bo xelkê gundên Dirbêsiyê navendeke tenduristiyê hat avakirin
